Fundaði með fulltrúum sveitarfélaga

Jóhanna Sigurðardóttir, forsætisráðherra, átti í dag fund með forsvarsmönnum landshlutasamtaka sveitarfélaga ásamt embættismönnum frá öllum ráðuneytum.  Alls sóttu um 40 manns fundinn sem haldinn var í Þjóðmenningarhúsinu. Efni fundarins var sóknaráætlanir landshluta, en þær eru eitt verkefnanna innan Ísland 2020.

Vinna við verkefnið hófst í byrjun árs 2011. Ný útfærsla á samskiptunum var samþykkt í ráðherranefnd um ríkisfjármál 21. febrúar sl.  Hún felur í sér að verkefnið verður grundvallað á þremur stoðum. Fyrsta stoðin felst í því að sameina undir einu þaki samninga og styrki (svo sem menningar- og vaxtasamninga) sem renna frá ríki til sveitarfélaga í gegnum landshlutasamtök.  Ætlunin er að gefa landshlutasamtökunum aukið vald  yfir þeim fjármunum og flytja umsýsluna til þeirra.

Önnur stoðin felst í sóknaráætlunum sem fulltrúar mismunandi landshluta vinna. Þær endurspegla forgangsröðun á hverjum stað og áherslur í byggðamálum sem fjárlagagerðin getur tekið mið af, að því er fram kemur í fréttatilkynningu frá forsætisráðuneytinu.

Þriðja stoðin snýr að umbótum í opinberri stjórnsýslu og samskiptum þessara tveggja stjórnsýslustiga.

„Markmiðið með sóknaráætlunum landshluta er að stuðla að umbótum í úthlutun almannafjár, framförum í samskiptum stjórnsýslustiga og nýsköpun í opinberri stjórnsýslu. Leiðin að þessum markmiðum er að endurskipuleggja fjárframlög ríkissjóðs til landshluta og um leið að einfalda úthlutun þess. Jóhanna Sigurðardóttir sagði meðal annars í upphafi fundarins að hún teldi afar mikilvægt að öll ráðuneytin kæmu fram sem einn aðili í þessari vinnu,“ segir í fréttatilkynningu.

Þegar hefur 11 verkefnum verið hleypt af stokkunum. Flest eru þau til fjögurra ára og er framlag ríkissjóðs áætlað alls um 460 milljónir króna.

Jóhanna sagðist sjá fyrir tvo kosti. Annars vegar að koma  á fót sjóði sem úthluta mætti úr 1. janúar 2013, en þar yrðu sameinaðir fjármunir sem nú renna til sveitarfélaga í formi samninga um ýmis verkefni.  Hins vegar að úthlutun úr sjóðnum hæfist ekki fyrr en 1. janúar 2014, en unnið yrði frekar úr fyrirliggjandi verkefnum og tekið við nýjum frá landshlutunum fram að þeim tíma.

Margir fulltrúar landshlutasamtakanna lýstu ánægju sinni með nýbreytni í samskiptum ríkisins og landshlutanna og aukinni áherslu á lýðræðisleg og markviss vinnubrögð, segir í fréttatilkynningu forsætisráðuneytisins.  

Ég fagna veru forsætisráðherra á fundinum. Það undirstrikar að ætlun stjórnvalda er að fylgja verkefninu eftir, taka upp ný vinnubrögð og auka lýðræði og valddreifingu,“ segir Karl Björnsson, framkvæmdastjóri Sambands íslenskra sveitarfélaga, í fréttatilkynningu ráðuneytisins en hann sat fundinn.

• 1 blogg um fréttina

Bloggað um fréttina

• Óðinn Þórisson: Jóhanna Sigurðardóttir