Liggja á bæn um lækkun

Vaxandi áhyggjur eru innan ferðaþjónustunnar af hækkandi eldsneytisverði og áhrifum þess á ferðavenjur fólks. Aukinn þrýstur er á stjórnvöld að lækka álögur en hið opinbera tekur um helming til sín af hverjum bensínlítra.

Samtök ferðaþjónustunnar benda á að eingöngu olíukostnaður hópferðabifreiða hafi aukist milli ára um 300 milljónir króna, eða um 25%, og nemi nú um þremur milljörðum króna. Þar af fær ríkið um 1,5 milljarða króna.

Í fréttaskýringu um þessi mál í Morgunblaðinu í dag kemur fram, að eftir því sem lengra er farið frá suðvesturhorninu aukast áhyggjurnar innan ferðaþjónustunnar. Austfirðingar liggja á bæn þessa dagana um lækkandi eldsneytisverð og gott veður í sumar.

Svanhildur Hlöðversdóttir, stöðvarstjóri N1 í Staðarskála, segir umferð innlendra ferðamanna hafa snarlega minnkað, enda sé orðið ódýrara að fara í viku á sólarströnd en að ferðast innanlands.