Innlent | mbl | 7.3.2012 | 15:05 | Uppfært 15:24

Segir framsetningu kaupmanna ranga

Kristín Soffía Jónsdóttir, varaformaður umhverfis- og samgönguráðs Reykjavíkur. mbl.is

Varaformaður umhverfis- og samgönguráðs Reykjavíkurborgar segir að upplýsingar í mótmælum kaupmanna vegna fyrirhugaðar lokunar fyrir bílaumferð á Laugavegi í sumar ekki réttar.

Í kjölfar fréttar mbl.is frá því í morgun um óánægju kaupmanna við Laugaveg um fyrirhugaða lokun á götunni í sumar hafði Kristín Soffía Jónsdóttir, varaformaður umhverfis- og samgönguráðs Reykjavíkurborgar samband til að benda á atriði sem hún taldi ástæðu til að leiðrétta.

„Á lokunarsvæðinu eru 100 rekstraraðilar og í fyrra þegar við prófuðum að gera göngugötu í fyrsta skipti fengum við ríflega 100 undirskriftir,“ segir Kristín.

Hún segir að mjög margir hafi nú skipt um skoðun sem upplifi lokun Laugavegarins sem jákvæðan hlut.

„Ég er mjög góðu sambandi við kaupmenn á lokaða svæðinu og flestir voru mjög ánægðir með reynslu síðasta sumars,“ segir Kristín og segir að upplýsingar í fréttinni um að sala hafi dregist saman við lokun séu ekki alveg réttar.

„Við erum búin að sjá þessar sömu tölur og það er bara ekki rétt,“ segir hún og bætir við: „Ef þú skoðar heildarveltuna þá hefur hún aukist. Ef þú skoðar bari og krár þá hefur veltan þar aukist. Síðan vorum við bara með 11 verslanir sem við gátum borið saman fyrir og eftir og þar er lítillegur samdráttur í smásölu,“ segir hún og bendir á að fataverslun hafi t.a.m. hrunið um allt land á milli ára og slíkt sé því ekki einsdæmi í miðborginni.

93 rekstraraðilar á lokunarkaflanum

„Bara á lokunarkaflanum eru 40 verslanir, 25 kaffihús, 23 skrifstofur, 3 hótel og 2 hárgreiðslustofur,“ segir Kristín og segir því ljóst að minnihluti kaupmanna hafi skrifað undir mótmælin.

Samkvæmt upplýsingum frá Jakobi Frímanni Magnússyni, miðborgarstjóra, eru um 150 rekstraraðilar starfandi á öllum Laugavegi.

Kristín segir einnig að sú reynsla sem endurspeglist í frétt mbl.is sé ekki hennar upplifun af reynslunni frá því í fyrra. Þá bendir hún á að kaupmenn hafi þá óskað eftir framlengingu á lokun eftir að upphaflegum lokunartíma lauk.

Hún segir að umræðan verði að eiga sér stað og að óánægjuraddir eigi að koma fram, en umræðan megi ekki vera skökk.

Laugavegur er ekki bara verslunargata

Samgönguskrifstofa borgarinnar sendi mbl.is ýmsar tölfræðiupplýsingar frá síðasta sumri. Hluti af þeim er fylgjandi fréttinni hér að neðan.

Samkvæmt upplýsingum frá samgönguskrifstofunni fjölgaði fólki í miðborginni síðasta sumar, innstigum í verslanir fjölgaði, mannlíf auðgaðist, heildarvelta á göngugötukaflanum jókst um 20,5%, en um 6,3% ef einungis eru teknir þeir inn í reikninginn sem voru með rekstur bæði árin á svæðinu.

Þá segir að veður í júlí í Reykjavík hafi verið verra 2011 en árið á undan, en þrátt fyrir það hafi fólksfjöldi í miðbænum aukist. Einnig kemur fram að hljóðvist hafi batnað, mengun hafi minnkað og að bílaumferð hafi ekki aukist á hliðargötum Laugavegar.

„Laugavegurinn er ekki bara verslunargata. Einnig íbúðar- menningar- og mannlífsgata. Hjarta borgarinnar,“ segir í upplýsingum frá samgönguskrifstofunni.

Hér að neðan má finna tölfræðilegar upplýsingar frá Reykjavíkurborg um innstig í verslanir og um umferð á svæðinu sumarið 2011.