Fjármálafyrirtæki munu ekki beita vanefndarúrræðum gagnvart þeim sem ekki greiða af ólöglegum gengistryggðum lánum sínum, vegna þeirrar óvissu sem ríkir eftir dóm Hæstaréttar. Formaður efnahags- og viðskiptanefndar Alþingis segir eðlilegt að lántakendur velti fyrir sér hvernig þeir bregðist við.

Nefndin fundaði með fulltrúum viðskiptabankanna, Lýsingu og Dróma í gær. Þar var gengið eftir því að virt yrðu leiðbeinandi tilmæli Fjármálaeftirlitsins um að vanefndarúrræði yrðu ekki nýtt, og hvernig eigi að ganga fram í innheimtuaðgerðum, og gæta hagsmuna þeirra sem hafa ofgreitt.

Helgi Hjörvar, formaður efnahags- og viðskiptanefndar, segir ljóst að þessum úrræðum verður ekki beitt á meðan óvissa ríkir. „Þessi fyrirtæki eru að meta hjá sér lánasöfnin miðað við fjórar ólíkar sviðsmyndir í túlkun dómsins. Niðurstaða úr því mun liggja fyrir um miðjan mánuðinn.“

Þá mun nefndin flytja eftir helgi frumvarp um lengingu á málshöfðunarfresti, þannig að þeir sem telja að á sér hafi verið brotið á síðustu árum hafi rúman tíma til að taka það upp við viðeigandi fjármálastofnun og sækja rétt sinn.

Ennfremur er verið að skoða mögulegar útfærslur á heimildum til dómstóla til flýtimeðferðar á þeim málum sem geta leyst úr þeim spurningum sem enn er ósvarað um túlkun á dómi Hæstaréttar. „Það eru spurningar sem aðeins Hæstiréttur getur svarað með dómi. Það er því mikilvægt að tryggja eins og kostur er, að þau mál sem eru til þess fallin að svara stóru álitaefnunum fái hraðan framgang. Og ég reikna með niðurstöðu í það eftir helgina,“ segir Helgi.

Ákvörðun sem hver og einn verður að taka

Helsta spurning sem lántakendur spyrja sig er hins vegar, eiga þeir að borga af lánum sínum?

„Það er auðvitað ákvörðun sem hver og einn þarf að taka fyrir sig.“ segir Helgi.

Hann bendir á að þau lán sem dómurinn nær klárlega til séu fasteignalán en þau séu eðli málsins samkvæmt til mjög langs tíma. Í flestum sé mikið eftir af höfuðstólnum og skuldarinn í þeirri aðstöðu að hægt er um vik að skuldajafna því sem hann kann að eiga kröfu um á fjármálafyrirtækið. „Þetta er meira álitaefni fyrir þá sem eru með styttri samninga þar sem jafnvel fáir gjalddagar standa eftir, til dæmis í bílalánum sem ýmislegt bendir til að gætu fallið undir þetta dómafordæmi. Þá er eðlilegt að menn velti því fyrir sér hvernig þeir eigi að bregðast við. Rétt er að undirstrika það, að ekki er farið í nein vanefndarúrræði.“