Undanþága fyrir Ísland ástæðulaus

Svandís Svavarsdóttir umhverfisráðherra segir þá ákvörðun sína að fella úr gildi undanþágur um sorpbrennslustöðvar frá næstu áramótum ekki hafa átt að koma sveitarfélögum á óvart.

Ráðherra sagði að hún teldi ekki ástæðu til þess að Íslendingar væru með undanþágur frá almennum reglum varðandi loftmengun.

Í umfjöllun um mál þetta í Morgunblaðinu í dag segir hún fyrstu heildstæðu landsáætlunina um meðhöndlun úrgangs nú komna fram og að sorpmálefni væru á ábyrgð sveitarfélaga. Hún hrósaði Eyjamönnum fyrir góðan árangur þeirra í meðhöndlun úrgangs.