Fyrsta vél easyJet lent í Keflavík

Flug breska flugfélagsins easyJet  frá London-Luton til Íslands hófst í dag og lenti fyrsta vélin á Keflavíkurflugvelli um kl. 8.30 í morgun.  Flogið verður þrisvar í viku, þriðjudaga, fimmtudaga  og sunnudaga.

Farmiðar munu koma til með að kosta frá 6.600 kr. aðra  leiðina  og  frá  tæpum  12.000  kr. fyrir báða leiðir, segir í tilkynningu frá félaginu.

Til  að koma til móts við vinsældir flugleiðarinnar, ákvað easyJet að hefja flug hingað til lands árið um kring og munu farmiðar í vetraráætlunina verða til sölu frá og með næsta fimmtudegi. 

Fyrsta  flugvél easyJet lenti á Keflavíkurflugvelli klukkan 8.31 í morgun, níu mínútum á undan áætlun og var íslenskur flugmaður, Davíð Ásgeirsson, við stjórnvölinn. Hann er  sérstaklega  ánægður  og stoltur að hafa fengið þann heiður að sitja við stjórnvölinn í þessu fyrsta flugi til Íslands, segir í fréttatilkynningu.

Talsmaður easyJet, Andrew McConnel sagði við komuna til Íslands í morgun:

„Við erum mjög ánægð með að flug frá London-Luton til Íslands sé hafið. Viðtökurnar  sem við höfum fengið eru frábærar. Það stefnir í að flugleiðin til  Íslands verði ein sú vinsælasta og því hefur easyJet ákveðið að fljúga allt árið til Íslands.“

Með  þessari  nýjustu viðbót  flýgur easyJet til 30 landa en flugfélagið er eitt hið stærsta  í  Evrópu með 200 flugvélar í flotanum sem fljúga á yfir 600 flugleiðum.

• Blogga um frétt