„Þarna upplýsir [utanríkisráðherra]  það að sjávarútvegsráðherra fór með rangt mál þegar hann sagði samninginn hafa runnið út,“ sagði Ragnheiður Elín Árnadóttir, þingflokksformaður Sjálfstæðisflokks, á Alþingi í dag eftir að Össur Skarphéðinsson staðfesti að samningi um aðalsamningamann Íslendinga í makríldeilunni hefði verið sagt upp.

Ragnheiður Elín spurði Össur út í orð Steingríms J. Sigfússonar sem í samtali við mbl.is  sagði að skýringin á því að Tómas H. Heiðar, aðalsamningamaður Íslendinga í makríldeilunni, væri hættur sem slíkur, væri sú að samningur hefði verið í gildi á milli utanríkisráðuneytisins og sjávarútvegsráðuneytisins um lán á Tómasi til sjávarútvegsráðuneytisins vegna makríldeilunnar. Sá samningur hefði runnið út fyrir skömmu.

Össur sagði rétt að samningur hefði verið á milli ráðuneytanna frá því í apríl 2009, um að tiltekinn hluti starfskrafta Tómasar yrði nýttur af hálfu sjávarútvegsráðuneytisins. Hins vegar hefði komið í ljós að sá hluti vinnugetu hans var miklu meiri en um var samið, og á stundum yfir 100% en samið var um 30%. Um væri að ræða eina þjóðréttarfræðing utanríkisráðuneytisins og það þyrfti á kröftum hans að halda.

Þá sagði Össur að samningnum hefði verið sagt upp í nóvember eða desember og uppsögnin tekið gildi 1. febrúar sl. 

Ragnheiður Elín sagðist ekki sammála þessari aðferðafræði, að skipta um hest í miðri á, í deilu sem væri jafn viðkvæm. Össur benti þá á að í sjávarútvegsráðuneyti mætti finna einn reyndasta samningamann Íslands þegar kæmi að deilum um uppsjávarfiskveiðar. 

Tengdar fréttir

Makrílveiðar

Eining um heildarkvóta en ekki skiptingu

• Útbreiðsla makríls í íslenskri landhelgi ein sú minnsta
• „Veiðiárangur er oft spurning um heppni“
• „Þetta gengur mjög rólega og lítið um makríl“
• Fyrsti makríllinn úr íslenskri lögsögu

» Fleiri tengdar fréttir

• 1 blogg um fréttina

Bloggað um fréttina

• Óskar Guðmundsson: Makríllinn.