Innlent | mbl | 29.3.2012 | 16:36 | Uppfært 20:38

„Verulegt áfall að vera ákærður“

Mynd 1 af 10 Hreiðar Már Sigurðsson tekst á við örlög sín, þegar hann gengur inn í dómsal 101 í Héraðsdómi Reykjavíkur. Mikill ágangur ljósmyndara virtist ekki á hann fá. Kristinn Ingvarsson

Mynd 2 af 10 Ólafur Ólafsson mætti skömmu á eftir Hreiðari Má, brosmildur að sjá. Kristinn Ingvarsson

Mynd 3 af 10 Ólafur Ólafsson býður Hreiðari Má Sigurðssyni hönd sína þegar inn í dómsal var komið. Hreiðar Már tók kumpánlega í hönd Ólafs. Kristinn Ingvarsson

Mynd 4 af 10 Ákæruvaldið er vel búið í Al-Thani-málinu. Saksóknari er Björn Þorvaldsson en hann hefur með sér úrvalslið aðstoðarmanna. Kristinn Ingvarsson

Mynd 5 af 10 Hreiðar Már Sigurðsson þurfti að sitja undir kastljósi fjölmiðla og kastljósum Héraðsdóms Reykjavíkur við fyrirtökuna í dag. Kristinn Ingvarsson

Mynd 6 af 10 Ragnar H. Hall, verjandi Ólafs Ólafssonar, lagði fram bréf þess efnis að lögheimili Ólafs sé rangt í ákærunni. Hann sé í raun búsettur í Sviss, ekki Bretlandi. Kristinn Ingvarsson

Mynd 7 af 10 Hreiðar Már Sigurðsson og Ólafur Ólafsson voru sakleysið uppmálað þegar þeir tóku afstöðu til ákæruatriðanna. Þeir endurtóku sömu setninguna: „Ég er saklaus af öllum ákæruatriðum.“ Kristinn Ingvarsson

Mynd 8 af 10 Ólafur Ólafsson klappar Birni Malmquist, fréttamanni Ríkisútvarpsins, og gefur með því til kynna að honum sé fyrirgefið. Björn hafði áður hafið viðtal við Ólaf en vék úr því miðju til að reyna ná tali af Hreiðari Má. Sá veitti hins vegar engin viðtöl og þurfti Björn því að snúa aftur, með skottið á milli lappanna. Kristinn Ingvarsson

Mynd 9 af 10 Ólafur Ólafsson gaf sér smá tíma fyrir fjölmiðlamenn. Hann sagði ákæruna koma sér verulega á óvart, ekki síst eftir að hann hafi skoðað gögn málsins. Kristinn Ingvarsson

Mynd 10 af 10 Hreiðar Már Sigurðsson, fyrrverandi forstjóri Kaupþings banka, og Hörður Felix Harðarson, verjandi hans, ganga yfir Lækjartorg, frá Héraðsdómi Reykjavíkur , eftir fyrirtöku í máli sérstaks saksóknara á hendur Hreiðari Má og þremur öðrum. Kristinn Ingvarsson

Ólafur Ólafsson og Hreiðar Már Sigurðsson fyrir Héraðsdómi Reykjavíkur í morgun. Morgunblaðið/Kristinn

„Því miður þá tel ég að þarna sé verið að misbeita valdi, en þetta er verulegt áfall, að vera ákærður. Málið fer svo sinn gang,“ sagði Ólafur Ólafsson, einn stærstu eigenda Kaupþings banka áður en hann féll, eftir fyrirtöku fyrir Héraðsdómi Reykjavíkur í dag.

Alls eru fjórir ákærðir í Al-Thani-málinu. Auk Ólafs eru það Hreiðar Már Sigurðsson, fyrrverandi forstjóri Kaupþings, Sigurður Einarsson, fyrrverandi stjórnarformaður bankans, og Magnús Guðmundsson, fyrrverandi forstjóri Kaupþings í Lúxemborg.

Samkvæmt ákæru eru Hreiðari Má gefin að sök umboðssvik í tveimur ákæruliðum og markaðsmisnotkun í öðrum tveimur. Magnús er ákærður fyrir hlutdeild í bæði umboðssvikum og markaðsmisnotkun eins og Ólafur Ólafsson. Sigurður er svo ákærður fyrir umboðssvik í einum lið en markaðsmisnotkun í tveimur.

Hreiðar Már, Ólafur og Magnús mættu allir fyrir héraðsdóm í dag og lýstu yfir sakleysi sínu. Áður hafði Sigurður gert hið sama. Að neðan má sjá myndasyrpu frá héraðsdómi í dag, en einnig ákæruna í heild sinni.