Vildu Vigdísi, en fengu Davíð

Fjölmargir lesendur mbl.is tóku í dag þátt í að velja andlit á nýja tíu þúsund króna seðilinn sem Seðlabankinn hyggst gefa út. Í samkeppninni sem efnt var til á vefnum í morgun gátu lesendur valið á milli nokkurra þjóðþekktra Íslendinga til að prýða peningaseðilinn.

En þar sem samkeppnin var aprílgabb var sama hvern lesendur völdu; þeir fengu alltaf þau skilaboð að þeir hefðu valið Davíð Oddsson, fyrrverandi seðlabankastjóra og nú ritstjóra Morgunblaðsins.

Við þökkum lesendum okkar fyrir að taka þátt í þessu með okkur og kosningin virðist hafa vakið áhuga margra, en rúmlega 26.000 manns höfðu tekið þátt í henni á tíunda tímanum í kvöld.

Margir kusu oftar en einu sinni, sá sem kaus oftast gaf Vigdísi Finnbogadóttur atkvæði sitt tíu sinnum á tveimur mínútum.

Þegar atkvæðin voru talin skömmu fyrir klukkan tíu í kvöld kom í ljós að Vigdís fékk flest atkvæði og í öðru sæti varð Halldór Laxness.

Bríet Bjarnhéðinsdóttir var í þriðja sæti og þar á eftir fylgdu Jónas Hallgrímsson, Davíð Oddsson, Steinn Steinarr, Ólafur Ragnar Grímsson og Hannes Hafstein.

Frétt mbl.is : Hver á að prýða peningaseðilinn?

Lesendum mbl.is bauðst í dag að kjósa um hvaða þjóðþekkti Íslendingur ætti að prýða nýja tíu þúsund króna seðilinn.

• 6 blogg um fréttina

Bloggað um fréttina

• Sigurður Haraldsson: Flott gabb.
• Eyjólfur Jónsson: Ójá, veljum Davíð
• Guðrún María Óskarsdóttir.: Eina frumlega aprílgabbið.
• Helga Kristjánsdóttir: Seinheppin!!
• Guðmundur Ásgeirsson: Gjaldmiðlaglens
• Ómar Ragnarsson: Féll fyrir plankastrekkjaranum.