„Ef himnaríki er til þá er það svona“

„Helgin var góð,“ segir Katrín Stefanía Klemenzardóttir, skálavörður í Landmannalaugum en rúmlega 30 manns gistu þar um páskana í einmuna blíðu.

„Já það er talverður snjór, en það hefur samt hlánað helling. Það er búinn að vera hiti allan tímann,“ segir Katrín og bætir við: „Það er fínt sleðafæri, það er nógur snjór þannig.“

„Um helgar verður hægt að fara hingað, en það verður ekki skálavörður fast. Ég verð núna fram á sunnudag. Svo verður bara séð til hvernig traffíkin er,“ segir Katrín en opið verður í Landmannalaugum um helgar næstu vikurnar og þarf að hafa samband við skrifstofu Ferðafélags Íslands til að fá inni í skálanum.

Góð færð fyrir vel búna jeppa

„Færðin er góð. Það er svolítið blautt, en fyrir vel búna jeppa þá er það ekkert mál. Það þarf svolítið að þræða sig. Passa sig bara að þræða sig á snjónum, en ekki á náttúrunni sjálfri,“ segir Katrín um færðina innúr. Hún segir að talsvert vatn sé í Jökulkvíslinni vegna leysinga.

„Veðrið er búið að vera yndislegt. Það er svo fallegt hérna núna. Ef himnaríki er til þá er það svona,“ segir Katrín að lokum.

Vetur í Landmannalaugum fyrir nokkrum árum. Frábært veður er á staðnum núna. mbl.is/Árni Sæberg

• Blogga um frétt