„Hvurslags fyrirhyggja er þetta eiginlega?“

„Hvernig stendur á því að þetta opinbera fyrirtæki veit ekkert af því að það á að fara að loka netsambandi við útlönd og ríkissjóður þurfi allt í einu að rjúka til í apríl, fjórum mánuðum eftir samþykkt fjárlagafrumvarps og bjarga málum?“ spurðu Pétur H. Blöndal, þingmaður Sjálfstæðisflokksins, á Alþingi í dag í umræðum um störf þingsins.

Tilefni ummælanna voru fréttir fjölmiðla um að ríkið hafi þurft að koma Farice ehf., sem rekur samnefndar sæstreng á milli Íslands og Evrópuríkja fyrir netsamband, til bjargar með notendasamningi upp á 355 milljónir króna á þessu ári.

Vísaði Pétur til þess að ríkissjóður ætti í gegnum Landsvirkjun og sjálfan sig meirihluta í Farice ehf. Spurði hann hvernig það hefði gerst að fyrst hafi uppgötvast í apríl að loka ætti á netsambandið í gegnum sæstrenginn vegna lausafjárvanda fyrirtækisins. „Hvurslags fyrirhyggja er þetta eiginlega?“ spurði Pétur.

Beindi hann þeirri fyrirspurn til þeirra þingmanna sem sætu eiga í fjárlaganefnd hvort málið hafi verið rætt eitthvað innan nefndarinnar í tengslum við fjárlagagerðina að fara ætti út í það að „skuldabinda ríkissjóð til þess að bjarga netsambandi við útlönd.“

Enginn fulltrúi úr fjárlaganefnd kvað sér hljóðs til þess að svara spurningum Péturs.

• 1 blogg um fréttina

Bloggað um fréttina

• Gísli Foster Hjartarson: Ánægður með Pétur