Siglt í steikjandi hita

Nýtt skip Ísfélags Vestmannaeyja, Heimaey VE-1, sigldi í gegnum Panamaskurðinn í nótt að íslenskum tíma. Skipið var formlega afhent í Síle 17. apríl sl. og er væntanlegt til landsins um miðjan maí.

Eyþór Harðarson, útgerðarstjóri Ísfélagins, segir í samtali við mbl.is að Heimaey hafi frá því á föstudagskvöld beðið í röð við skipaskurðinn. Umferð við skurðinn sé mikil og auk þess þurfi skipið að gangast undir ýmsar skoðanir.

Á öðrum tímanum í nótt komst skipið komst loks í gegn. „Núna er það bara beina leiðin heim,“ segir Eyþór.

Sjö manna íslensk áhöfn er um borð ásamt fulltrúa frá skipasmíðastöðinni ASMAR í Síle.

Eyþór segir að siglingin gangi vel. Á þessum slóðum sé hins vegar steikjandi hiti og það sé eina vandamálið sem áhöfnin glími við, ef vandamál skyldi kalla. Aðspurður segist Eyþór reikna með því að skipið verði komið á leiðarenda eftir um það bil hálfan mánuð, en það lagði úr höfn 19. apríl sl.

Heimaey VE-1 er af nýrri kynslóð uppsjávarskipa, er 71,1 metra langt og 14,4 metra breitt en burðargeta þess er rúmlega 2.000 tonn.

• 1 blogg um fréttina

Bloggað um fréttina

• Gísli Foster Hjartarson: Hlakka til......