„Fólk er komið á brúnina“

„Ég tel að miklu fleiri séu í fjárhagserfiðleikum í dag. Þetta er fólkið sem er komið á brúnina,“ segir Harpa Njáls félagsfræðingur í tilefni af nýjum tölum Creditinfo sem sýna að um 26.400 einstaklingar á Íslandi séu nú í alvarlegum vanskilum.

Þórhallur Heimisson prestur hefur allt frá hruni hvatt til aðgerða til handa efnalitlu fólki. Hann kveðst daglega taka á móti fólki sem eigi um sárt að binda vegna bágra kjara.

Í þeim hópi séu hjón og sambúðarfólk sem deili vegna stöðugra fjárhagsáhyggna. Þá komi til hans fólk á sextugsaldri sem sé orðið úrkula vonar um að fá aftur vinnu. Almennt séu þessi mál þó í betri farvegi en fyrir tveim árum og „ýmis úrræði farin að virka betur en áður“.

Í umfjöllun um þessi mál í Morgunblaðinu í dag segir Guðmundur Magnússon, formaður Öryrkjabandalags Íslands, marga öryrkja búa við afar kröpp kjör og að fjárhagsstaða þeirra hafi ekki verið jafn slæm í áratugi.