„Þetta verður mjög spennuþrungin atkvæðagreiðsla,“ segir Vigdís Hauksdóttir, þingmaður Framsóknar, um fyrirhugaða kosningu á Alþingi á morgun um þá tillögu hennar að borið skuli undir þjóðina hvort stöðva eigi aðildarviðræður við Evrópusambandið samhliða þjóðaratkvæði um tillögur stjórnlagaráðs.

Til frekari tíðinda dró í Evrópumálum í gær þegar Guðfríður Lilja Grétarsdóttir, þingmaður VG, lagði fram bókun í utanríkismálanefnd þess efnis að efna þyrfti til þjóðaratkvæðagreiðslu hið fyrsta, fyrir lok þess árs, um hvort þjóðin vilji ganga inn í Evrópusambandið eða ekki.

Spurð út í bókunina telur Guðfríður Lilja „einboðið að þjóðin fái að koma að málinu“. Hún kveðst munu styðja tillögu Vigdísar. Ekki sé „hægt að útiloka“ að meirihluti sé fyrir tillögu Vigdísar í þinginu. „Það verður að koma í ljós. Hver og einn hlýtur að leggja sitt mat á hvað sé rétt að gera,“ segir Guðfríður Lilja.

Rætt er við nokkra þingmenn um málið í Morgunblaðinu í dag og bendir lausleg talning til þess að tillaga Vigdísar verði felld, að því gefnu að þingmenn Samfylkingar og níu þingmenn VG hafni henni.

Tengdar fréttir

Ísland og ESB

Óttast einangrun og hóta neitunarvaldi

• Vilja endurupptöku á viðræðum um aðild að ESB
• Sekta ekki skip sem uppfylla ekki kröfur
• Hitnar í kolum vegna fiskveiði
• ESB gerir athugasemd við fetaost frá MS

» Fleiri tengdar fréttir