Ásmundur Einar: Slagsíða í ESB umræðunni

„Í aðdraganda þess að Alþingi samþykkti að leggja fram umsókn um aðild að Evrópusambandinu gáfu stjórnmálamenn fyrirheit um það að jafnræðis, hlutleysis og hlutlægni yrði gætt í umræðu um málið“, segir Ásmundur Einar Daðason, alþingismaður í grein í Morgunblaðinu í dag.

Ásmundur segir að þrátt fyrir þessu fögru fyrirheit sé langt í land með að jafnræði sé með þeim aðilum sem mæla með og á móti aðild að ESB. Evrópusambandið hefur þannig ákveðið að verja hundruðum milljóna króna til kynningar, m.a. í gegnum Evrópustofu.

Í niðurlagi greinarinnar segir Ásmundur Einar: „Það er með öllu óskiljanlegt að stjórnvöld og stjórnarþingmenn sem eru eiðsvarnir Stjórnarskrá landsins skuli láta þetta óátalið. Þessu verður að linna, því þetta er ekkert annað en skerðing á jafnræði þeirra sem eru með og á móti aðild að ESB og þetta grefur þar með undan eðliegri lýðræðislegri umræðu um kosti Íslands í alþjóðamálum“.