Innlent | mbl | 30.5.2012 | 11:29 | Uppfært 11:47

Miklar breytingar til batnaðar

mbl.is/Rax

„Þetta eru miklar breytingar til batnaðar, en það var líka margt sem mátti bæta,“ segir Daði Már Kristófersson dósent við Háskóla Íslands, en hann kom fyrir atvinnuveganefnd Alþingis í morgun þar sem fjallað var um breytingatillögur á frumvarpi um veiðigjöld. Daði Már segir veiðigjaldið þó enn hátt og af því hafi hann áhyggjur.

Daði Már og Stefán B. Gunnlaugsson, lektor við Háskólann á Akureyri, unnu í vor ítarlega úttekt á frumvarpinu um veiðigjöld að beiðni atvinnuveganefndar Alþingis. Segja má að í úttektinni hafi þeir gefið frumvarpinu falleinkunn.

Daði tók fram að hann hefði haft stuttan tíma til að skoða breytingartillögur meirihluta atvinnuveganefndar, en augljóst væri að breytingarnar væru til bóta. Nefndin hefði tekið tillit til margra ábendinga sem hann og Stefán settu fram í greinargerð sinni.

Eitt af því sem Daði og Stefán gagnrýndu var að í frumvarpinu væri renta ofmetin, svo nemur tugum prósenta vegna villu í útreikningum. Daði sagði að þetta hefði verið lagfært með breytingatillögunum. Heimilaður hefði verið frádráttur vegna neikvæðrar rentu og einnig hefði verið tekið tillit til eigna með skynsamlegri hætti en gert var áður.

„Það er samt þannig að sérstaka veiðigjaldið er enn hátt og ég hef af því áhyggjur. Þó gjaldið eitt og sér sé þannig að mörg fyrirtækjanna gætu tekist á við það þá má ekki gleyma því að til viðbótar koma til aðgerðar í hinu frumvarpinu,“ sagði Daði.

Í frumvarpinu um stjórn fiskveiða er m.a. gert ráð fyrir að lagt verði 3% gjald á viðskipti með aflahlutdeild. Daði sagði að með því væru útgerðir þvingaðar til að viðhalda óbreyttu rekstrarformi, nú þegar svo miklar breytingar væru að eiga sér stað á rekstrarumhverfinu. Stækkun á pottum þýddi einnig verulega skerðingar á aflahlutdeild margra fyrirtækja.

„Það er varasamt að skoða þessi frumvörp hvort í sínu lagi vegna þess að geta útgerðarinnar til að standa undir greiðslu veiðigjalds er að sjálfsögðu háð almennum skilyrðum útgerðarinnar, eins og fyrirkomulagi úthlutun veiðiheimilda á komandi árum og að sjálfsögðu takmörkunum á viðskipti með aflahlutdeild og aflamark,“ sagði Daði.