Innlent | mbl | 31.5.2012 | 23:27

Fáklætt fólk mátti víða finna

Mynd 1 af 14 Í Nauthólsvík er ýmislegt hægt að finna sér til dundurs, annað en að lesa í sólinni. Þessir sólbrúnu ungu menn sýndu flott tilþrif. Ómar Óskarsson

Mynd 2 af 14 Ekki áttu allir þess kost að flatmaga allan daginn og nýttu því sumir sér matarhlé til að viðra sig. Ómar Óskarsson

Mynd 3 af 14 Oftar en ekki má finna fólk koma saman á Austurvelli, og ekki síst þegar til sólar sést. Ómar Óskarsson

Mynd 4 af 14 Kaffihúsin í kringum Austurvöll eru vinsæl í góða veðrinu og getur verið gott að kæla sig niður með drykk. Ómar Óskarsson

Mynd 5 af 14 Fáir skemmta sér eins vel og ungviðið þegar viðrar vel til útiveru. Það sást vel í Nauthólsvík. Ómar Óskarsson

Mynd 6 af 14 Þegar hitinn verður óbærilegur er gott að taka á sprett og beint út í kælandi sjóinn. Ómar Óskarsson

Mynd 7 af 14 Sjósund nýtur sífellt meiri vinsælda hér á landi en þó finnast menn sem eru efins þegar út í er komið. Ómar Óskarsson

Mynd 8 af 14 Austurvöllur er vinsæll staður til útiveru. Styrmir Kári

Mynd 9 af 14 Bjartir dagar í Hafnarfirði voru settir og settu litrík börnin mark sitt á opnunarhátíðina. Eggert Jóhannesson

Mynd 10 af 14 Ef frá er talið unga fólkið eru það íssalarnir sem kætast helst þegar sólin sést. Styrmir Kári

Mynd 11 af 14 Víst er það ekki allra að baða sig í sólinni en njóta þess þá fremur að svamla sjónum. Ómar Óskarsson

Mynd 12 af 14 Engu líkara var en að í útlöndum væri, svo mörg voru hjólin við Nauthólsvík. Ómar Óskarsson

Mynd 13 af 14 Ekki búa allir við þann lúxus að vinna úti þegar svo vel viðrar. Styrmir Kári

Mynd 14 af 14 Strákar verða strákar. Þessir léku sér á pramma við Nauthólsvík og hentu sér fram af með stæl. Eggert Jóhannesson

Fjölmenni var í Nauthólsvík í dag. mbl.is/Ómar Óskarsson

Hiti í Reykjavík fór hæst í fimmtán stig í dag og óhætt að segja að veðrið hafi leikið við íbúa höfuðborgarinnar. Hvert sem litið var mátti sjá fáklætt fólkið njóta lífsins og heyra raulaðan söngtexta við lag GCD: „Sumarið er tíminn.“

Veðrið var víðast hvar á landinu gott í dag og fór hiti hæstur í 18,8 stig á Hvanneyri og Húsafelli, að því segir á vefsvæði Veðurstofu Íslands.

Samkvæmt spá Veðurstofunnar mun veður breytast lítið til morguns. Búið er við hægviðri eða hafgolu og verður yfirleitt léttskýjað, en sums staðar þokubakkar við sjóinn í nótt. Hiti 12 til 20 stig að deginum, hlýjast í uppsveitum SV-lands, en svalara úti við A-ströndina.

Laugardagurinn verður einnig sérdeilis góður og breytist hiti lítið. Hins vegar má búast við síðdegisskúrum á laugardag og tekur að kólna með kvöldinu.

Ljósmyndarar mbl.is og Morgunblaðsins fóru víða um bæinn í dag og smelltu af myndum. Sjá má myndasyrpu af íbúum höfuðborgarsvæðisins í góða veðrinu í dag hér að neðan.