Sat föst í ánni með tvö börn

Björgunarsveitin Dagrenning á Hvolsvelli var kölluð út um klukkan fjögur í dag þegar tilkynning barst um að kona og tvö börn sætu föst í bíl í Gilsá, sem er norðan Markarfljóts til móts við Húsadal í Þórsmörk. Samkvæmt tilkynningu frá Slysavarnafélaginu Landsbjörgu hugðist konan aka bílnum yfir vað í ánni en var ekki komin alla leið yfir þegar bíllinn stöðvaðist.

Þá var hópur björgunarsveitarfólks úr Flugbjörgunarsveitinni í Reykjavík, sem staddur var í Básum, einnig kallaður til. „Konan beið í bílnum með börnin eftir aðstoð þrátt fyrir að töluvert flæddi inn í hann. Björgunarsveitin var komin á staðinn og búin að ná fólkinu í land um 45 mínútum eftir að útkall barst. Voru allir heilir á húfi. Þessa stundina er verið að reyna að ná bílnum úr ánni,“ segir í tilkynningunni.

Slysavarnafélagið Landsbjörg minnir ferðafólk á að fara varlega þegar ár eru þveraðar. Þær séu oft vatnsmeiri seinni part dags og þá ekki síst þegar veður er gott og sól skín.

• 1 blogg um fréttina

Bloggað um fréttina

• Ómar Ragnarsson: Þarf stórar áletranir á skiltum.