Grænlenska makrílveiðiskipið Erika fékk ekki að landa hér makríl sem það veiddi í grænlensku efnahagslögsögunni. Útgerðin hafði reiknað með að geta landað á Íslandi. Skipið var búið að fá 550 tonn, að sögn fréttavefjarins Sermitsiaq, þegar bannið kom í fyrradag og átti að reyna að landa í Færeyjum.

Ane Hansen, sem fer með sjávarútvegsmál í grænlensku landstjórninni, hafði samband við íslensk stjórnvöld vegna málsins. Stjórnarformaður útgerðar Eriku sagði Íslendinga haga sér gagnvart Grænlendingum eins og þeir sökuðu ESB um að koma fram við sig.

Eyþór Björnsson fiskistofustjóri sagði ástæðuna fyrir því að Erika fékk ekki að landa hér að finna í íslenskum lögum. Í lögum um veiðar og vinnslu erlendra skipa í fiskveiðilandhelgi Íslands (22/1998) segi að skipum, sem stunda veiðar úr fiskistofnum sem ekki eru samningar um nýtingu á, eins og makrílstofninum, sé óheimilt að koma til hafna á Íslandi. Eyþór benti á að lögin væru frá 1998 og því nokkuð langsótt að tengja þetta makríldeilunni. 

Tengdar fréttir

Makrílveiðar

Eining um heildarkvóta en ekki skiptingu

• Útbreiðsla makríls í íslenskri landhelgi ein sú minnsta
• „Veiðiárangur er oft spurning um heppni“
• „Þetta gengur mjög rólega og lítið um makríl“
• Fyrsti makríllinn úr íslenskri lögsögu

» Fleiri tengdar fréttir