Innlent | mbl | 7.8.2012 | 22:01 | Uppfært 22:20

Starfsmenn ráðuneyta ræddu samruna

Steingrímur J. Sigfússon, sjávarútvegs- og landbúnaðarráðherra, efnahags- og viðskiptaráðherra og iðnaðarráðherra. mbl.is/Ernir Eyjólfsson

Haldinn var starfsmannafundur í hádeginu í dag með starfsmönnum sjávarútvegs- og landbúnaðarráðuneytisins, iðnaðarráðuneytisins og efnahags- og viðskiptaráðuneytisins til að ræða samruna þessara ráðuneyta inn í nýtt atvinnuvega- og nýsköpunarráðuneyti hinn 4. september næstkomandi.

Á vegum ráðuneytisins er starfandi stýrihópur ráðuneytisstjóranna þriggja, Kristjáns Skarphéðinssonar, ráðuneytisstjóra í iðnaðarráðuneytinu, Sigurgeirs Þorgeirssonar, ráðuneytisstjóra í sjávarútvegs- og landbúnaðarráðuneytinu, og Helgu Jónsdóttur, ráðuneytisstjóra í efnahags- og viðskiptaráðuneytinu. Kristján er formaður hópsins.

Vinnuhópar starfsmanna funda til 15. ágúst

„Það var starfsmannafundur í hádeginu og síðan vorum við að vinna í 6-7 vinnuhópum. Þeir verða að vinna fram til 15. ágúst og síðan verður það sem kemur út úr þeirri vinnu nýtt til að setja nýtt skipulag fyrir ráðuneytið. Í framhaldinu hefst vinna við gerð skipurits fyrir ráðuneytið,“ sagði Kristján um það sem fram fór á fundinum í dag.

Á fundinum kom fram, líkt og kveðið var raunar á um í þingsályktunartillögu um málið, að öllum starfsmönnum ráðuneytanna yrði boðin vinna áfram. Þetta staðfestir Kristján og segir: „En svo náttúrlega er ekki þar með sagt að það verði allir sem fái nákvæmlega eins störf og þeir eru í í dag, en það var það sem var gengið út frá, að allir fái starf.“

Öll starfsemi verði á sama stað 20. september

Það er búið að ákveða að nýtt ráðuneyti taki til starfa 4. september næstkomandi. Kristján segir talað um að 20. september verði allir starfsmenn fluttir í sama húsnæðið á Skúlagötu 4, þar sem sjávarútvegs- og landbúnaðarráðuneytið er í dag.

Eins og áður hefur verið fjallað um standa yfir breytingar á skipan ráðuneyta í Stjórnarráði Íslands. Þegar nýtt atvinnuvega- og nýsköpunarráðuneyti verður sett á fót verða auk þess til tvö önnur ný ráðuneyti.

Breytingar verða á tveimur ráðuneytum til viðbótar

Annars vegar umhverfis- og auðlindaráðuneyti, sem að stofninum til er núverandi umhverfisráðuneyti. Hins vegar fjármála- og efnahagsráðuneyti, en hluti af efnahags- og viðskiptaráðuneytinu færist yfir til þess.

Nokkur flutningur verkefna mun því eiga sér stað þegar þessi stóra breyting á skipan stjórnarráðsins verður í haust.