360 þúsund á mann

Ef Ísland væri aðili að Evrópusambandinu og evrusamstarfinu mætti gera ráð fyrir að ábyrgðir ríkisins vegna björgunarsjóðs evrunnar væru um 115 milljarðar króna. Það jafngildir 362.692 kr. á hvern einstakling eða 1.450.768 kr. á hverja fjögurra manna fjölskyldu.

Þetta kemur fram í útreikningum sem Guðlaugur Þór Þórðarson, þingmaður Sjálfstæðisflokksins, hefur tekið saman með aðstoð Upplýsingaþjónustu Alþingis. Guðlaugur Þór segir einnig að Ísland þyrfti að borga um 9-11 milljarða á ári í sameiginleg fjárlög ESB.

„Þetta var reiknað í vor og það hefur ýmislegt gerst í sumar og ýmislegt mun væntanlega gerast í haust svo þetta er jafnvel vanáætlað,“ segir Guðlaugur Þór í umfjöllun um mál þetta í Morgunblaðinu í dag. Hann segist furða sig á því að samfylkingarmenn tali eins og enginn viti hvað sé að gerast í álfunni. Það hafi komið í ljós að þeir sem höfðu uppi varnaðarorð þegar evran fór af stað hafi því miður haf rétt fyrir sér.