Innlent | mbl | 1.9.2012 | 18:23

40 ár frá stækkun fiskveiðilögsögunnar

Mynd 1 af 2 Bresku herskipin beittu þeirri aðferð að reyna að sigla á íslensku varðskipin.

Mynd 2 af 2 Togvíraklippurnar komu að góðum notum. Morgunblaðið

Í dag eru fjörutíu ár liðin frá því að fiskveiðilögsagan var færð út í 50 sjómílur. Á þeim tíma voru Íslendingar komnir með nýtt vopn gegn landhelgisbrjótum, svokallaðar togvíraklippur sem skorið gátu botnvörpur aftan úr breskum togurum með tilheyrandi tilkostnaði fyrir útgerðina.

Frá september 1972 til nóvember 1973 tókst íslensku varðskipunum að beita þeim með árangursríkum hætti í 82 skipti gegn breskum togurum sem voru að veiðum innan 50 mílna markanna, að því er fram kemur í fréttatilkynningu frá Landhelgisgæslunni.

Í fjölmiðlum 1. september 1972 sagði m.a. að við útfærsluna stækkaði yfirráðasvæði íslendinga um 141 þúsund ferkílómetra og væri landhelgin þá tvöföld stærð landsins. Þar segir einnig að Íslendingar færðu út fiskveiðilögsöguna til að tryggja skynsamlega hagnýtingu fiskimiðanna í þágu allra þeirra sem þurfa fiskafurðir til lífsviðurværis, beint og óbeint. Þjóðin verði standa sameinuð um að nýta fiskimiðin vel og skynsamlega. Varðskipin verði vegna þess bakhjarl og framvörður þjóðarinnar.