Innlent | mbl | 3.9.2012 | 13:33 | Uppfært 16:17

Ásakanir um „sýndarútboð“ á áætlunarferðum

mbl.is/Golli

Strætó bs. hefur fjölgað áætlunarferðum sínum út á landsbyggðina frá höfuðborgarsvæðinu. Mikill kurr er meðal rútufyrirtækja sem höfðu til áramóta sérleyfi til aksturs á mörgum þeirra leiða sem Strætó bs. sinnir nú.

Óskar Stefánsson, framkvæmdastjóri hjá Bílum og fólki, telur óeðlilega að því staðið hvernig Strætó bs. fékk leyfi til þess að stunda akstur úti á landsbyggðinni. „Mér finnst fullkomlega óeðlilega að þessu staðið. Þeir fengu þetta upp í hendurnar,“ segir Óskar.

Gátu ekki staðist kröfur um standandi farþega

Um áramótin voru sérleyfi felld úr gildi en rútufyrirtækin höfðu sinnt langferðum út á landsbyggðina frá höfuðborgarsvæðinu fram að því. Í kjölfarið voru einkaleyfi tekin upp og hóf Strætó bs. áætlunarferðir út á land í kjölfarið.

Sveitarfélögum var falið að sjá um að setja þessa tegund samgangna í útboð. Lítill áhugi var fyrir því að taka þátt í útboðunum af hálfu rútufyrirtækjanna en Óskar segir það stafa af því að ekki var hægt að standast kröfur sem settar voru í útboðslýsingum.

„Það var mjög erfitt að standast kröfur í útboðslýsingum. Kröfurnar voru þannig að þær henta illa til vetraraksturs á landsbyggðinni. Meðal annars var rútufyrirtækjum gert að bjóða upp á þann möguleika að fólk gæti staðið í bílunum. Ég held að margir aðilar í þessum geira hafi ekki verið tilbúnir að leggja þá ábyrgð á bílstjóra sína að keyra með standandi farþega,“ segir Óskar.

Sýndarútboð og samið undir borð

Tyrfingur Guðmundsson, meðeigandi í rútufyrirtækinu Guðmundur Tyrfingsson, tekur undir gagnrýni Óskars. „Þetta er á góðri leið með að útrýma vinnu hjá rútubílstjórum yfir vetrartímann,“ segir Tyrfingur.

Hann segir fyrirtækið til þessa m.a. hafa sinnt akstri fyrir framhaldsskóla á Suðurlandi og á Snæfellsnesi en nú sé það búið að missa þau viðskipti vegna aukinna krafna.

„Það gat enginn staðist kröfurnar og því var Strætó bara réttur aksturinn. Útboðin hafa hingað til verið sýndarútboð. Útboðskröfurnar eru þannig að það getur enginn staðið við þær. Það hafa engir bílar verið framleiddir sem standast þær. Kröfurnar voru svo felldar niður eftir útboðið því það býður enginn í þetta. Síðan er samið um þetta undir borðið við Strætó bs. Þetta er búið að gerast í mörgum útboðum,“ fullyrðir Tyrfingur.