„Fer fram á afsögn Svandísar og Jóhönnu“
Setja bókamerki
Þingmaður Sjálfstæðisflokksins segir fjölmiðla hafa lesið yfirlýsingu Björns Vals Gíslasonar, þingflokksformanns Vinstri grænna, frá því fyrr í dag rangt. Hann sé í raun að gefa innanríkisráðherra gálgafrest en kalla eftir afsögn umhverfisráðherra og forsætisráðherra.
Eins og mbl.is greindi frá í dag skrifaði Björn Valur á vefsvæði sitt í dag, að Ögmundur Jónasson innanríkisráðherra hefði nokkra möguleika í stöðunni eftir að kærunefnd jafnréttismála komst að þeirri niðurstöðu að hann hefði brotið jafnréttislög.
Björn Valur segir að ef Ögmundur hafi frumkvæði að því að leita sátta í málinu jafngildi það viðurkenningu hans á því að hafa gengið gegn lögum við skipan í embættið. Fari málið til dómstóla og kveðinn verði upp sá dómur að ráðherra hafi gert rétt með skipan í embættið sé málið dautt.
„Ef dómur verður á annan veg verður ráðherra að mínu mati að víkja úr embætti. Það sama á við ef ráðherra leitar hvorki sátta né til dómstóla. Þetta á að mínu mati almennt við um mál af þessu tagi, óháð því hver ráðherrann er,“ skrifaði Björn Valur.
Áttuðu sig ekki á stóru fréttinni
Guðlaugur Þór Þórðarson, þingmaður Sjálfstæðisflokks, segir á vefsvæði sínu að fjölmiðlar hafi ekki áttað sig á stóru fréttinni í málinu, þrátt fyrir að Björn Valur hafi vart getað sett það skýrar fram.
„Tveir ráðherrar í þessari stjórn hafa verið dæmdir af dómstólum fyrir að fara ekki að lögum. Svandís Svavarsdóttir og Jóhanna Sigurðardóttir.
Skilaboð þingmannsins eru skýr. Hann fer fram á afsögn Svandísar og Jóhönnu en gefur Ögmundi gálgafrest.
Það verður fróðlegt að heyra viðbrögð ráðherranna,“ segir Guðlaugur Þór.
Kristrún komin með umboð
Fundar með Þorgerði og Ingu eftir hádegi
„Höfum ákveðið að hefja viðræður“
Runólfur í veikindaleyfi
„Við bara reynum að þrýsta þessu fram“
Fundurinn hófst með söng: „Við stöndum þétt saman“
