Ræddu um breytingar á stjórnarskránni

Samfylkingin hélt opið málþing í dag um breytingar á stjórnarskránni, en í ráðgefandi þjóðaratkvæðagreiðslu um stjórnarskrána 20. október næstkomandi, verður spurt um ákvæði um náttúruauðlindir í þjóðareign, persónukjör, jafnt vægi atkvæða, málskotsréttinn og þjóðkirkjuna. Fjölmennt var á málþinginu sem haldið var í Iðnó og voru nokkrir stjórnlagaráðsfulltrúar á meðal ræðumanna.

Valgerður Bjarnadóttir, formaður skipulags- og eftirlitsnefndar Alþingis, fjallaði um mikilvægi kosninganna. Þá tók Þorvaldur Gylfason, prófessor við HÍ við, og fjallaði um náttúrauðlindir og mikilvægi þess að þær væru í þjóðareigu. 

Arnfríður Guðmundsdóttir, prófessor við HÍ, fjallaði um þjóðkirkjuna og sagði að umræðan um hana mætti ekki enda á villigötum. Í erindi sínu fjallaði Katrín Fjeldsted læknir um trú og mannréttindi og Eiríkur Bergmann dósent í Háskólanum á Bifröst fjallaði um persónukjör, mismunandi tegundir þess og vald forseta Íslands.

Þá gerði Ari Teitsson bóndi vægi atkvæða og valddreifingu að umtalsefni í erindi sínu.

• 3 blogg um fréttina

Bloggað um fréttina

• Guðmundur Jónas Kristjánsson: Stjórnarskrá Samfylkingar og ESB !
• Jóhann Elíasson: ALGJÖRLEGA MÁTTLAUS OG ÓMARKVISS ÞJÓÐARATKVÆÐAGREIÐSLA...
• Ómar Ragnarsson: 161. árs gamall draumur kæfður á ný?