Ónákvæmni á ónákvæmni ofan

Í fjárlagafrumvarpinu fyrir árið 2013 kemur fram að velferðarráðuneytið hyggst spara 220 milljónir með því að hætta greiðsluþátttöku í metýlfenidatlyfjum fyrir fullorðna enda séu „lyfin einungis ætluð börnum og unglingum samkvæmt klínískum leiðbeiningum“.

Staðreyndin er hins vegar sú að embætti landlæknis hefur gefið út klínískar leiðbeiningar um notkun á þessum lyfjum fyrir fullorðna. Fullyrðingin er röng eða „ónákvæm“, að því er fram kemur í fréttaskýringu um þetta mál í Morgunblaðinu í dag.

Á laugardag fjallaði Morgunblaðið um þá „ónákvæmni“ sem fólst í því að í sama kafla fjárlagafrumvarpins segir að nýtt greiðsluþátttökukerfi lyfja eigi að spara 250 milljónir. Í ljós kom að þarna var átt við að spara ætti 250 milljónir í almennum lyfjakostnaði, ekki með nýja kerfinu.

Einar Magnússon, lyfjamálastjóri velferðarráðuneytisins, segir að orðalagið í frumvarpinu sé mjög ónákvæmt að þessu leyti.