Nauðsynlegt að hefja gjaldtöku

Björgólfur Jóhansson forstjóri Icelandair group segir að nú sé svo komið að nauðsynlegt sé að hefja gjaldtöku að náttúruperlum á Íslandi. Öðrum kosti sé mikil hætta á því að umhverfi nærri náttúruperlunum muni láta á sjá. Fyrir vikið verði upplifunin af því að koma á staðina ekki eins tilkomumikil og hún gæti ellegar orðið.

„Ég held að það sé lykillinn að framtíðinni í ferðamennsku á Íslandi. Við  þurfum að passa okkur á umgengni og viðhaldi á þessum stöðum. Við erum að leita að tekjum til að uppfylla þær skyldur og ég held að þetta sér rétta leiðin ef það á að vera hægt að viðhalda þjónustu,“ segir Björgólfur. 

Hann segir að það sé nauðsynlegt að innheimta gjald fyrir þjónustu með þessum hætti en ekki seilast í vasa allra skattborgara með öðrum leiðum.

„Það er mun skynsamlegra að taka gjald frá þeim sem eru á staðnum heldur en að gera það óbeint með gistináttagjaldi eða öðru,“ segir Björgólfur.
 
„Það skiptir ekki máli hvort um er að ræða staði í almannaeigu eða einkaeigu. Við eigum einfaldlega að taka þetta skref núna. Það er ekki á mörgum stöðum í heiminum sem þú getur gengið að án þess að greiða fyrir. Slíkt skref yrði ferðamannaiðnaðinum til heilla. Ég er sannfærður um það,“ segir Björgólfur.  

Björgólfur Jóhannsson forstjóri Icelandic Group mbl.is/Kristinn

• 4 blogg um fréttina

Bloggað um fréttina

• Ásgrímur Hartmannsson: Hvað er frítt að skoða?
• Njörður Helgason: Ábyrgð þeirra sem taka gjald af komu er mikil.
• Þórir Kjartansson: Illa ígrunduð umræða
• Kjartan Eggertsson: Sérstakt gjald þegar þú virðir fyrir þér íslenska náttúru.