Almannavarnadeild ríkislögreglustjóra  skipulagði nú um helgina umfangsmiklar aðgerðir, í samvinnu við Slysavarnafélagið Landsbjörg, búnaðarráðunauta, bændur og aðra hlutaðeigandi. Aðgerðirnar beindust að því að gera lokaátak við að finna sauðfé sem hafði hrakist og grafist í snjó í óveðrinu sem gekk yfir landið 9. og 10. september síðastliðinn. Ríkisstjórnin veitti fjármuni í verkefnið til að þetta væri framkvæmanlegt, segir í tilkynningu frá Ríkislögreglustjóra.

Yfir hundrað björgunarsveitarmenn aðstoðuðu fjölda bænda við leit og smölun allt frá Húnavatnssýslum í vestri og austur í Kelduhverfi. Við aðgerðirnar var notaður fjöldi björgunarsveitarbíla, fjór- og sexhjól, vélsleðar, snjóbílar, þyrla Landhelgisgæslunnar auk flugvéla í einkaeigu.

Aðgerðirnar gengu vel og var um 150 lifandi fjár grafið upp úr snjó og auk þess fundust og var komið til byggða miklum fjölda fjár sem hrakist hafði undan veðrinu. Fjöldi fjár fannst einnig dauður. Vel gekk að koma lifandi fé til byggða og lauk skipulögðum aðgerðum í ljósaskiptunum í gærkvöldi.

Nú á næstu dögum mun koma í ljós hversu margt fé hefur ekki skilað sér og þá verður hægt að fara að gera grein fyrir því tjóni sem bændur hafa orðið fyrir.

Með þessu átaki lauk skipulagðri leit og björgun sauðfjár en bændur munu áfram svipast um eftir fé eftir því sem aðstæður leyfa.

Það fé sem fannst á lífi grafið í snjó nú þrem vikum eftir óveðrið var margt í ágætu ástandi en inni á milli var töluvert um veikburða fé.

Tengdar fréttir

Óveður í september

„Við tökum enga áhættu“

• Fé falið undir fannhvítri jörð
• 350 milljónir til bænda á kalsvæðum
• Tjón skiptir hundruðum milljóna
• Kortleggja á vandann hjá bændum

» Fleiri tengdar fréttir

• 1 blogg um fréttina

Bloggað um fréttina

• Ómar Bjarki Kristjánsson: þarf ekki ESB að styrkja smalamennskur á Íslandi?