Innlent | mbl | 8.10.2012 | 23:58

Útséð um að viðræðum ljúki fyrir kosningar

Við höfuðstöðvar ESB í Brussel. Reuters

Ekki er raunhæft að ætla að aðildarviðræðunum við ESB ljúki fyrir þingkosningarnar í apríl, að mati Árna Þórs Sigurðssonar, þingmanns VG og formanns utanríkismálanefndar. Árni Þór segir það hvergi hafa verið skrifað niður að viðræðum skyldi lokið á kjörtímabilinu.

Árni Þór fór yfir stöðu aðildarviðræðnanna í umræðum um stöðu þeirra á Alþingi í dag og lét þá m.a. þessi orð falla.

„Þegar ákveðið var hér í þessum sal að óska eftir viðræðum við Evrópusambandið um aðild Íslands að bandalaginu bundu margir vonir við að viðræðunum myndi ljúka á þessu kjörtímabili. Ég vil þó taka fram að það er hvergi skrifað í gögn málsins - og þá vísa ég fyrst og fremst til nefndarálits utanríkismálanefndar frá þessum tíma - neinir tímafrestir hvað það snertir. Það er hins vegar útséð um það núna að mínu viti að viðræðunum ljúki á kjörtímabilinu. Það eru enn þá eftir erfiðustu kaflanir en ég vil líka taka það fram að af Íslands hálfu hefur verið lokið við umfjöllun um 28 kafla af 33 nú þegar.

Svo það verður ekki sagt að samninganefnd Íslands, eða aðrir sem að þeim málum koma, svo sem utanríkismálanefnd Alþingis eða ríkisstjórn, hafi ekki unnið vel á grundvelli ályktunar Alþingis. Þvert á móti höfum við unnið ágætlega hvað þetta snertir við undirbúninginn. En tenging Evrópusambandsins við óskyld ágreiningsmál, um makríldeiluna milli Íslands, Evrópusambandsins, Færeyja, Noregs og Rússlands hefur óneitanlega varpað öðru ljósi á framgang malsins. Og sú tenging hefur ítrekað verið gagnrýnd af hálfu Íslands,“ sagði Árni Þór og vék að evrukreppunni og þróun efnahagsmála hér á landi eftir hrun.

Eðlilegt að meta stöðu viðræðnanna

„Þróun efnahags- og peningamála í Evrópu og góður árangur núverandi ríkisstjórnar við að koma efnahagsmálum Íslands á rétta braut hefur einnig haft áhrif á mat margra á núverandi stöðu. Það er þess vegna eðlilegt að við metum stöðu viðræðnanna og hvernig best verði haldið á þeim í framhaldinu. Einkum þarf að horfa til þess hvort líklegt sé að staða viðræðnanna verði i meginatriðum á sama stað við kjörtímabilamót og hún er á í dag.

Við mat á því hvernig best er að halda á málum verði fyrst og fremst að meta hvað gagnast Íslandi best hvað varðar aðildarferlið og eins í sambandi við samskipti okkar við Evrópusambandið almennt, m.a. á sviði efnahagsmála og m.t.t. langtímahagsmuna í viðskiptum... Það er sömuleiðis brýnt að það verði íslenska þjóðin sem ákveður framtíð sína hvað tengslin við Evrópu áhrærir og sá réttur verði ekki af henni tekinn. Og því er að mínu viti misráðið - það væri misráðið - að slíta viðræðum nú.“