Innlent | mbl | 9.10.2012 | 15:00 | Uppfært 15:28

Rök fyrir því að aðlögunartími sé of stuttur

Steingrímur J. Sigfússon. mbl.is/Kristinn

Steingrímur J. Sigfússon, atvinnu- og nýsköpunarráðherra, sagði á Alþingi í dag, að málefnaleg rök hefðu verið sett fram fyrir því að aðlögunartími vegna fyrirhugaðrar hækkunar virðisaukaskatts á gistingu væri of stuttur enda væri búið að gefa út verðskrá fyrir næsta sumar.

Steingrímur sagðist hins vegar telja fráleitt, að hækkunin væri rothögg á ferðaþjónustu, eins og látið hefði verið að liggja, og margt mælti með því að hækka virðisaukaskatt á gistingu úr lægra skattþrepi í það hærra.

Vísaði hann til þess, að árið 2007 hefðu stjórnvöld í rausnarskap sínum lækkað virðisaukaskatt á hótelgistingu og veitingahúsum í 7%. Árið eftir hefði gengi krónunnar hrunið og við það myndast geysilega hagstæð starfs- og samkeppnisskilyrði fyrir þessa atvinnugrein, sem hún hefði búið að síðan. „Og ég er ekki viss um að það hafi allt skilað sér í verðlækkun til kúnnanna,“ sagði Steingrímur.

Disney-væðing

Rætt var um stöðu ferðaþjónustunnar á Alþingi í dag að frumkvæði Ásmundar Einars Daðasonar, þingmanns. Þór Saari, þingmaður Hreyfingarinnar, sagði m.a. að fram hefði komið á fundi atvinnuveganefndar þingsins í morgun, að fyrirhuguð skattahækkun á ferðaþjónustu myndi valda 1,9% hækkun á heildarkostnaði erlendra ferðamanna hér færi hún öll út í verðlagið.

Sagði Þór að hans upplifun á því að ferðast um Ísland væri að okurverð væri á gistingu og þjónustu. Ferðaþjónustan fengi að auki hundruð milljóna árlega af skattfé til auglýsinga. Þá væri fjöldi ferðamanna orðinn allt of mikill og væri að svipta Íslendinga þeirri upplifun, sem þeir ættu að hafa af eigin landi. „Það er verið að Disney-væða og þar með afskræma landið í þjónustu við erlenda ferðamenn,“ sagði Þór.

Gunnar Bragi Sveinsson, þingmaður Framsóknarflokks, lýsti furðu á orðum Þórs. Hann sagði að heildarframlegð 30 stærstu hótelanna á landsbyggðinni væri aðeins um 600 milljónir króna. „Hvernig getum við rökstutt að þessi atvinnugrein geti tekið meira á sig?“ spurði Gunnar Bragi.