Innlent | mbl | 23.11.2012 | 19:18 | Uppfært 19:57

Undirstrikar óvissu um styttri lánin

Héraðsdómur Reykjavíkur. mbl.is/Hjörtur

Dómur sem féll í dag í Héraðsdómi Reykjavíkur um útreikning gengisláns hjá SP-fjármögnun gengur þvert á niðurstöður héraðsdóms sem féll 8. nóvember í sambærilegu máli. Helgi Sigurðsson, lögmaður SP-fjármögnunar, segir þetta sýna að enn sé mikil óvissa um útreikning lánanna. Hann segir ábyrgðarleysi að líta svo á að fullnaðarkvittanir víki frá meginreglunni um fullar efndir þegar um lán til skamms tíma er að ræða. Nauðsynlegt sé að bíða niðurstöðu Hæstaréttar.

Dómurinn sem féll í dag fjallaði um gengistryggt bílalán sem Plastiðjan tók hjá SP-fjármögnun, en dómurinn féll SP-fjármögnun í vil. Dómurinn sem féll 8. nóvember fjallaði einnig um gengistryggt bílalán SP-fjármögnunar til fyrirtækisins Samvirkni. Sá dómur féll Samvirkni í vil. Helgi segir að lánasamningarnir í báðum þessum málum séu sambærilegir.

Helgi segir að í máli Plastiðjunnar vísi dómarinn til útreikninga Hæstaréttar í dómi Borgarbyggðar sem féll í október sl. Dómarinn bendir á að endurreikningur samkvæmt viðmiði í Borgarbyggðar-dómnum hafi falið í sér viðbótarkröfu um vexti fyrir tímabilið upp á rúmlega 244 þúsund. „Sú fjárhæð er hvorki umtalsverð í krónum talið né í samanburði við upphaflega lánsupphæð sem var liðlega 4.500.000 krónur,“ segir í dómnum.

Helgi segir að þessi upphæð hafi ekki verið talin nægjanlega há til að víkja frá þeirri meginreglu að kröfuhafinn eigi að fá fullar efndir á greiðslu. Í þessu máli Borgarbyggðar var hlutfallið 28%. Í svokölluðu Elviru-máli var þetta hlutfall 34%, en í þessu máli var hlutfallið 5,4%.

Ekki hægt að hefja endurútreikning lánanna

„Staðreyndin er sú að í styttri samningum er afborgunarhlutfallið miklu hærra en í lengri samningnum í upphafi lánstímans. Það leiðir til þess að sú fjárhæð sem Hæstiréttur miðar við verður miklu lægri, enda hefur Hæstiréttur vísað til þess í sinum forsendum að lengd lánstímans skipti máli. Þessi dómur undirstrikar það sem m.a. Fjármálaeftirlitið hefur bent á að ennþá sé óvissa um hvaða afleiðingar fullnaðarkvittanir hafi þegar um styttri samninga er að ræða. Það er þess vegna algerlega fráleitt af hálfu forsætisráðherra og formanns efnahags- og viðskiptanefndar Alþingis að gera þá kröfu til fjármálafyrirtækja að þeir eigi fylgja dómum og reikna út lánin að nýju. Til hvaða dóma er verið að vísa ? Er átt við dóminn sem féll í dag eða einhvern annan dóm? Það er óhjákvæmilegt að fá endanlega niðurstöðu Hæstaréttar varðandi gildi fullnaðarkvittana í styttri samningum eins og var niðurstaða samráðshóps lántaka og lánveitenda eftir dóm Hæstaréttar í febrúar,“ segir Helgi.

Helgi segir að þeir sem eru að stýra fjármálafyrirtækjum í dag beri ábyrgð samkvæmt lögum, þ.e. gagnvart hluthöfum og kröfuhöfum þessara félaga og verða að miða sínar ákvarðanir við það.