Hnúfubakur lenti í skrúfu Herjólfs

„Hér á landi man ég ekki eftir svona skýru dæmi,“ segir Gísli Víkingsson, líffræðingur, spurður að því hvort algengt væri að hvalir dræpust í skipskrúfum, en hnúfubakur fannst á föstudag fyrir viku í Bakkafjöru og þykir víst að hann hafi lent í skrúfu Herjólfs nokkru áður.

„Einhver dæmi þar sem menn ályktuðu að það væri hugsanlegt, en ég man ekki eftir fleiri dæmum. Þetta er samt þekkt vandamál úti í heimi þar sem skipaumferð er mikil. Kannski mest við austurströnd Bandaríkjanna þar sem leifarnar af sléttbaksstofninum eru í verulegri útrýmingarhættu og þetta talin ein stærsta dauðaorsökin,“ segir Gísli.

„Það er kannski ekki alveg hægt að negla það 100% að ég hafi gert þetta og hann fannst þremur dögum seinna,“ segir Guðlaugur Ólafsson, skipstjóri Herjólfs, í umfjöllun um mál þetta í Morgunblaðinu í dag.