„Keimur af karamellu“ af súrmatnum

Vösk sveit kjötiðnaðarmanna sem starfar hjá SS á Hvolsvelli kom saman í morgun til að kanna gæði súrmatarins sem nú er í verkun og fer í sölu á komandi þorra.

 Eins og flestir vita hefst verkun súrmatarins strax í lok ágúst og er hann þá lagður í mysu samkvæmt kúnstarinnar reglum.  Framleiðsluferlið er langt og ekki hægt að bregðast við ef eitthvað fer úrskeiðis á lokastigi framleiðslunnar.  Hvergi má því slaka á kröfum. Fylgjast þarf vel með sýrustigi, hitastig í kælum þarf að vera rétt og birta má ekki vera of mikil. Skipta þarf reglulega um mysu og hún þarf að vera fersk og hafa hinn rétta tón í bragði.

 Verkun súrmatar má líkja við verkun og framleiðslu á eðalvínum og því er alltaf spennandi að vita hvernig til tekst frá ári til árs, segir í frétt frá SS. Skemmst er frá því að segja að súrmaturinn fékk  lof viðstaddra sem allir hafa sterkar skoðanir á gæðum og eiginleikum súrmatar. Meðal athugasemda sem heyrðust voru:  „Ferskt og gott mysubragð“, „keimur af karamellu“, „angan af lyngi“, „flauelsmjúkir hrútspungar“ og „gott eftirbragð sem minnir á göngur og réttir“.

 Til að gleðja bragðlauka þeirra áköfustu verður ein tegund af blönduðum súrmat í fötu sett á markað um miðjan desember, segir í frétt SS.

• 1 blogg um fréttina

Bloggað um fréttina

• Ásgrímur Hartmannsson: Karamellusúrmatur!