Lagðist gegn ályktun um makríl

Össur Skarphéðinsson utanríkisráðherra sótti í gær  fund EES-ráðsins í Brussel með öðrum utanríkisráðherrum EFTA-ríkjanna og fulltrúum framkvæmdastjórnar ESB. Þetta kemur fram í fréttatilkynningu frá ráðuneytinu.

Meginefni fundarins var yfirferð um stöðu og framkvæmd EES-samningsins. Af Íslands hálfu lýsti utanríkisráðherra þeirri afstöðu, að æ fleiri mál sem taka þurfi upp í samninginn sköpuðu stjórnarskrárbundin vandamál fyrir Ísland, þar sem í þeim fælist framsal valds umfram það sem stjórnarskráin heimilaði. Gæti þetta leitt til vandkvæða varðandi fulla þátttöku Íslands í samningnum í framtíðinni að óbreyttri stjórnarskrá.

Harmaði að ESB og Noregur skyldu ekki fallast á tillögu Íslands

Í tilkynningu ráðuneytisins segir að hreinskiptnar umræður hafi verið á fundinum um stöðu makrílmálsins. Utanríkisráðherra mun hafa lýst þeirri skoðun Íslands að þar sem EES-samningurinn tæki ekki yfir fiskveiðar teldi hann ekki rétt að fjalla um málið á þessum vettvangi. Hann lagðist gegn því að ályktað yrði um málið. Hann harmaði jafnframt að ESB og Noregur skyldu ekki treysta sér til að fallast á tillögu Íslands um að þar sem ekki hefði tekist að leysa makríldeiluna skæru allir málsaðilar niður veiðar sínar í hlutfalli við niðurstöðu Alþjóðahafrannsóknarráðsins um nauðsynlega minnkun veiða úr stofninum.

Ísland styður aðild Palestínu að Sameinuðu þjóðunum

Á sérstökum fundi um stöðuna fyrir botni Miðjarðarhafs ítrekaði utanríkisráðherra að Ísland myndi næstkomandi fimmtudag styðja tillögu forseta Palestínu um aukaaðild landsins að Sameinuðu þjóðunum.

• 2 blogg um fréttina

Bloggað um fréttina

• Ómar Geirsson: Er EES samningurinn ekki þá sjálfdauður???
• Valdimar Samúelsson: Hvað er Össur að tala um að einhvað sé ekki …