Skotið á skrifstofu framkvæmdastjóra

Fram kemur á forsíðu Eyjafrétta að skotið hafi verið á rúðu á skrifstofu framkvæmdastjóra Ísfélags Vestmannaeyja. Lögreglan telur ekki að um byssuskot hafi verið að ræða. Líklegra sé að skotið hafi verið í gegnum tvöfalt glerið með stálkúlu úr einhvers konar túttubyssu. Engin kúla hefur fundist. 

Fram kemur í fréttinni að málið sé nokkurra vikna gamalt en framkvæmdastjórinn ku hafa verið fjarverandi þegar atvikið gerðist. Lögreglan í Vestmannaeyjum hefur fengið lögregluna í Reykjavík til liðsinnis við rannsókn málsins. 

„Engin kúla hefur fundist en krafturinn hefur verið það mikill að glersalli skildi eftir ummerki á gardínu og papp­írsblokk sem var fyrir innan. Ef um leikfang er að ræða er það mjög öflugt, að hafa náð að brjóta tvöfalt gler í þetta mikilli hæð,“ segir í fréttinni. Skrifstofa forstjóra er á þriðju hæð.  

Nokkrir hafa verið yfirheyrðir og fram kemur að Forráðamenn Ísfélagsins líti málið alvarlegum augum. „Sama hvort þarna hafi verið um beina árás á Ísfélagið að ræða eða að einhverjir séu með túttubyssur eða annað sem er stórhættulegt.

Vilja bæði lögreglan og Ísfélagsfólk hvetja foreldra og aðra til að grípa í taumana verði þau vör við að ungmenni séu með túttubyssur eða önnur hættuleg „leikföng“ undir höndum,“ segir í fréttinni. 

Fréttina má nálgast á

<a href="http://www.eyjafrettir.is/frettir/2012/12/12/malid_litid_alvarlegum_augum" title="Málið litið alvarlegum augum">vef Eyjafrétta</a>

.