Margir nýir sem sækjast eftir aðstoð

Mæðrastyrksnefnd hefur í dag úthlutanir fyrir jólin. Að sögn Ragnhildar Guðmundsdóttur, formanns Mæðrastyrksnefndar, hafa margar umsóknir borist um hjálp.

„Okkur finnst ásóknin vera mjög mikil. Við sjáum mörg ný andlit. Hingað koma öryrkjar, námsfólk, og þá sérstaklega konur sem eru með börn á framfæri, fólk í lægstu launaflokkunum, stórar fjölskyldur og eldri borgarar sem orðið hafa fyrir niðurskurðarhnífnum,“ segir Ragnhildur.

Hún vill koma á framfæri þakklæti til allra þeirra sem gefið hafa í söfnunina.