Bústofn varð ekki fyrir eitrun

Lokið er rannsóknum á heilsufari grasbíta í Reyðarfirði, sem ráðist var í í kjölfar bilunar á mengunarvarnarbúnaði Fjarðaáls sl. sumar. Niðurstaðan er að bústofn hefur ekki orðið fyrir eitrun þrátt fyrir hærra flúorgildi.

Þar sem hluti grasbíta, einkum reiðhross, étur í vetur hey, sem í er flúor, verður fylgst áfram með dýrunum, samkvæmt upplýsingum frá Alcoa Fjarðaáli.

Engin merki um eitrun í beinum

Engin merki eru um flúoreitrun í beinum grasbíta í Reyðarfirði þrátt fyrir hækkun á flúorgildi í grasi sl. sumar, sem kom til vegna bilunar í mengunarvarnarbúnaði Fjarðaáls. Þetta sýna niðurstöður rannsókna dýralækna á beinsýnum. Í skýrslu dýralækna um skoðun á beinsýnum úr ellefu kindum frá bænum Sléttu segir að tennur og kjálkabein sýni engin merki um flúoreitrun.

Þó var flúor í beinum yfir þúsund míkrógrömm á hvert gramm af beinösku og sýndi rannsóknin jafnframt fram á að meðalstyrkur flúors hefur aukist frá árinu 2006, eða áður en Fjarðaál hóf framleiðslu.

Í kjölfar þess að starfsmenn Fjarðaáls áttuðu sig á biluninni var Náttúrustofu Austurlands, Tilraunstöð Háskóla Íslands á Keldum og Nýsköpunarmiðstöð falið að kanna áhrif mengunarinnar á heyfeng og grasbíta í firðinum. Byrjað var að kanna ástand heyfengs og leiddi sú rannsókn í ljós að flúor í heysýnum var undir mörkum í 15 sýnum af 17.

Skömmu fyrir áramót bárust síðan niðurstöður dýralæknis á sjónrænni skoðun á þrjátíu grasbítum á svæðinu. Samkvæmt skýrslu hans bendir ekkert til að þeir hafi orðið fyrir flúoreitrun af völdum þessarar tímabundnu flúoraukningar í útblæstri frá Fjarðaáli. Þar sem hluti grasbíta í Reyðarfirði étur enn hey af umræddum túnum í Reyðarfirði verður áfram fylgst með ástandi bústofns.

• 2 blogg um fréttina

Bloggað um fréttina

• Arnar Pálsson: Rannsóknir á flúor í umhverfi álvers
• Torfi Kristján Stefánsson: Ekki eitrun en mikið flúor í beinum?