Jón Margeir íþróttamaður Reykjavíkur

Sundkappinn Jón Margeir Sverrisson var í dag útnefndur íþróttamaður Reykjavíkur 2012. Borgarstjórinn, Jón Gnarr, veitti Jóni Margeiri verðlaunin við hátíðlega athöfn í Höfða í. Jón Margeir fékk farandbikar sem gefinn er af Reykjavíkurborg ásamt eignarbikar og 200.000 króna styrk frá Íþróttabandalagi Reykjavíkur.

Jón Margeir varð Ólympíumeistari í 200m skriðsundi á Ólympíumótinu í London í sumar. Jón setti einnig nýtt og glæsilegt heimsmet í þessu sama sundi.  Jón setti þrjú heimsmet á árinu auk þess að vinna til margra verðlauna í hinum ýmsu sundgreinum á mótum erlendis.  Hann er einnig margfaldur Íslandsmeistari árið 2012.

Tíu fengu viðurkenningu

Tíu aðrir afreksmenn fengu einnig viðurkenningu fyrir árangur sinn á árinu 2012 í Höfða í dag sem afhentar voru af formanni Íþróttabandalags Reykjavíkur, Ingvari Sverrissyni. Íþróttamennirnir eru þau:

 *   Aníta Hinriksdóttir, Íþróttafélagi Reykjavíkur

 *   Anton Sveinn McKee, Sundfélaginu Ægi

 *   Ásdís Hjálmsdóttir, Glímufélaginu Ármanni

 *   Ásgeir Sigurgeirsson, Skotfélagi Reykjavíkur

 *   Einar Daði Lárusson, Íþróttafélagi Reykjavíkur

 *   Eygló Ósk Gústafsdóttir, Sundfélaginu Ægi

 *   Guðný Jenný Ásmundsdóttir, Knattspyrnufélaginu Val

 *   Haraldur Franklín Magnús, Golfklúbbi Reykjavíkur

 *   María Guðsteinsdóttir, Glímufélaginu Ármanni

 *   Þormóður Jónsson, Júdófélagi Reykjavíkur

• Blogga um frétt