Innlent | mbl | 11.1.2013 | 21:22 | Uppfært 14.1.2013 10:46

5.5 milljóna kr. munur á árslaunum hjúkrunarfræðinga

Hjúkrunarfræðingar fá betri laun í Noregi. Árni Sæberg

Hjúkrunarfræðingar sem starfa í Noregi fá 5,5 milljónum króna meira í árslaun en þeir sem starfa á Íslandi. Áhugi meðal hjúkrunarfræðinga á að starfa í Noregi og fyrirspurnir þar um hafa aukist mjög, að sögn framkvæmdastjóra á ráðningarstofu sem sérhæfir sig í að útvega íslensku heilbrigðisstarfsfólki atvinnu erlendis.

„Ég finn fyrir mikilli fjölgun fyrirspurna frá hjúkrunarfræðingum sem eru forvitnir um vinnu í Noregi. Þar er fullt af vinnu að fá,“ segir Rósa Þorsteinsdóttir, framkvæmdastjóri hjá ráðningarskrifstofunni Sólstöðum, sem sérhæfir sig í að útvega heilbrigðisstarfsfólki afleysingastörf til lengri eða skemmri tíma hér á landi og erlendis.

150 mættu á fund

Sólstaðir eru eina íslenska fyrirtækið sem sendir íslenska hjúkrunarfræðinga utan. 19 hjúkrunarfræðingar fóru til Noregs á vegum Sólstaða árið 2011 en árið 2012 voru þeir 33. Rósa segist finna fyrir miklu meiri áhuga nú en áður. Tengja megi það við uppsagnir á Landspítalanum en 270 hjúkrunarfræðingar hafa sagt þar upp á undanförnum mánuðum.

„Það mættu 150 hjúkrunarfræðingar á fund hjá okkur í nóvember þar sem það var kynnt hvernig við stöndum að þessu,“ segir Rósa.

Frítt flugfar og húsnæði

Hún segir mikinn mun á kjörum hjúkrunarfræðinga á Íslandi og í Noregi. Sem dæmi má nefna að árslaun hjúkrunarfræðings eftir 10 ára í starf í Noregi eru að sögn Rósu um 10 milljónir íslenskra króna. Sambærileg laun á Íslandi eru um 4,5 milljónir á ári samkvæmt kjarakönnun hjúkrunarfræðinga frá árinu 2012.

Hér ber þó að taka fram að um daglaun er að ræða. Eins ber að huga að því að mikill gengismunur er á íslensku og norsku krónunni.

„Fólk sem fer út fær yfirleitt frítt flugfar og húsnæði, en þarf sums staðar að halda sér uppi sjálft,“ segir Rósa.