OR hækkar vatns og fráveitugjöld

Orkuveita Reykjavíkur hækkaði gjald fyrir kalda vatnið um áramót til samræmis við byggingavísitölu og fráveitugjaldið um 5% að auki vegna kostnaðar við endurnýjun í eldri götum.

Orkuveitan hefur sent út tæplega 62 þúsund álagningarseðla vatns- og fráveitugjalda vegna ársins 2012. Gjöldin skiptast á níu gjalddaga á árinu. Sá fyrsti er 4. febrúar og sá síðasti 2. október. Hægt er að óska eftir að greiða gjöldin í einu lagi á miðju ári.

Í tilkynningu frá OR segir að gjald fyrir kalda vatnið hafi hækkað um áramót til samræmis við byggingavísitölu og fráveitugjaldið um 5% að auki vegna kostnaðar við endurnýjun í eldri götum, sem áður var borinn af sveitarsjóðum.

Orkuveitan tók við innheimtu vatns- og fráveitugjalda í ársbyrjun 2011 en áður voru þau innheimt með fasteignagjöldum sveitarfélaga. Þau sveitarfélög þar sem fyrirtækið innheimtir vatnsgjöld eru Reykjavík, Akranes, Borgarbyggð, Álftaneshluti Garðabæjar, Stykkishólmur, Grundarfjörður, í hluta Hvalfjarðarsveitar og í Úthlíð í Biskupstungum. Fráveitur rekur Orkuveitan í Reykjavík, á Akranesi og í Borgarbyggð.

• 1 blogg um fréttina

Bloggað um fréttina

• Haraldur Haraldsson: OR hækkar vatns og fráveitugjöld//Lúxusþjófar hækka gjöld!!!!