Sammála um nauðsyn aðgerða

Það er ætlun stjórnvalda að ljúka við að endurmeta kvennastörf hjá ríkinu áður en kjarasamningar renna út í haust. Þetta kom fram í máli Katrínar Júlíusdóttur fjármálaráðherra á Alþingi  í morgun. Rætt var um kynbundinn launamun í sérstökum umræðum á Alþingi í morgun.

Málshefjandi var Unnur Brá Konráðsdóttir, þingmaður Sjálfstæðisflokksins. Hún vísaði til þess að kannanir sýndu að ríkisstjórnin hefði lítið gert til að berjast gegn kynbundnum launamun á þessu kjörtímabili.

Unnur segir ekki nóg að tala hátt um breytingar, sýna þurfi viljann í verki. Hún nefndi sem dæmi að í Reykjanesbæ hafi náðst gríðarlegur árangur í að útrýma kynbundum launamun. Það sýni að verkefnið sé alls ekki ógerlegt.  Hún kallaði eftir skýrum áætlunum, verklagi og tímasetningum frá stjórnvöldum í baráttunni við kynbundinn launamun.

Katrín tók undir orð Unnar um nauðsyn þess að útrýma kynbundnum launamun sem hún nefndi meinsemd í íslensku samfélagi. Nefndi Katrín viljayfirlýsingu stjórnvalda og aðila vinnumarkaðarins um útrýmingu kynbundins launamunar. Á grundvelli yfirlýsingarinnar hefði verið stofnaður starfshópur og nú væri verið að ráða tvo starfsmenn sem ættu að kortleggja landslagið.

Þá nefndi Katrín að á þriðjudag hefði ríkisstjórn samþykkt sérstakt jafnlaunaátak. Í því fælist endurmat á störfum til að jafna laun kynjanna. Katrín sagði að byrjað yrði á heilbirgðisstéttum en þar virtist munurinn vera mestur.  

• 1 blogg um fréttina

Bloggað um fréttina

• Jóhann Kristinsson: HVAÐ ER AÐ......