Innlent | mbl | 25.1.2013 | 21:10 | Uppfært 23:20

Ólafur Ragnar: Evrópa er vandamálið

Ólafur Ragnar Grímsson á Bessastöðum. mbl.is/Sigurgeir Sigurðsson

Ólafur Ragnar Grímsson, forseti Íslands, sagði á Alþjóðaefnahagsþinginu í Davos í dag að fiskveiðistefna Evrópusambandsins væri „algjörlega misheppnuð“ enda séu um 75% af fiskistofnum Evrópu í hættu.

Á ráðstefnunni í Sviss eru staddir helstu stjórnmálaleiðtogar og áhrifamenn úr viðskiptalífinu og í dag var m.a. rætt um ástand fiskistofna sjávar. „Evrópa er vandamálið,“ hefur BBC eftir Ólafi Ragnari. „Það er þversagnakennt að Evrópumenn líti á sjálfa sig sem upplýstustu stefnumótendur í heimi,“ bætti hann við.

Í frétt BBC er jafnframt haft eftir Frans Muller, framkvæmdastjóra verslunarkeðjunnar Metro sem mun vera langstærsti fiskseljandi Evrópu, að á heimsvísu séu um 20% fiskstofna í útrýmingarhættu eða mjög slæmu ástandi.

Yfirmaður Scripps-sjávarrannsóknarstofnunarinnar við Kaliforníuháskóla segir sömuleiðis að ástand sjávar sé grafalvarlegt, ekki aðeins í Evrópu. „Við höfum sagt fiskisstofnunum stríð á hendur og við höfum sigrað þá,“ hefur BBC eftir honum. „Við höfum ekki efni á því að halda þessu stríði til streitu. Við verðum að draga okkur í hlé.“

„Risastórar marglyttur“ það eina sem eftir verður

Ólafur Ragnar sagði að verði ekkert gert til að snúa við hruninu í evrópskum fiskistofnum verði heimshöfin gjörsneydd öllu lífi líkt og eyðimörk. „Það eina sem mun fljóta um verða risastórar marglyttur,“ sagði forsetinn. „Það er kominn tími til að við horfum í spegil. Er þetta efst á forgangslista Evrópu? Nei. Er þetta á dagskrá hjá leiðtogum Evrópu sem hittast nokkrum sinnum á ári til að funda um bankakreppuna? Nei.“

Að sögn BBC fullyrti forseti Íslands á ráðstefnunni í dag að aðeins tvö Evrópulönd hefðu stýrt fiskveiðum sínum með sjálfbærum hætti, þ.e. Ísland og Noregur. Benti hann á að hvorugt landið ætti aðild að Evrópusambandinu.

Hann sagði að þrátt fyrir allt væri þó ástæða til bjartsýni um framtíð hafsins og nefndi í því samhengi að með hjálp nútímatækni væri í auknum mæli hægt að merkja fisk sem veiddur væri með sjálfbærum veiðum þannig að neytendur geti með snjallsímum komist að því hvaðan fiskurinn sem þeir kaupi sé.