Innlent | mbl | 5.2.2013 | 12:42 | Uppfært 14:51

Umræðan um ESB á villigötum

Framsögumenn á fundi í Norræna húsinu um framhald aðildarviðræðna við ESB. mbl.is/Golli

Umræðan um það að halda eigi aðildarumsókn Íslands að Evrópusambandinu áfram til að sjá hvað bíður landsmanna þar er á villigötum. Þetta sagði Sigmundur Davíð Gunnlaugsson, formaður Framsóknarflokksins, á málfundi Heimssýnar um framtíð aðildarviðræðnanna í Norræna húsinu í hádeginu í dag.

Á fundinum fluttu erindi auk Sigmundar: Bjarna Benediktsson, formaður Sjálfstæðisflokksins, Árni Páll Árnason, formaður Samfylkingarinnar, Árni Þór Sigurðsson, þingmaður Vinstri grænna, og Guðmundur Steingrímsson, formaður Bjartrar framtíðar. Fundarstjóri var Páll Magnússon útvarpsstjóri.

Bjarni Benediktsson benti á að ESB hefði að mörgu leyti breyst síðan Ísland sótti um aðild að sambandinu. Bjarni spurði í erindi sínu hvar þeir væru sem vildu fyrirvaralaust ganga inn í Evrópusambandið. Benti hann á að í öllum öðrum ríkjum sem sótt hefðu um aðild að sambandinu hefðu menn boðað fyrirvaralausan stuðning við aðild.

Þá sagði hann ekki einu sinni Össur Skarphéðinsson utanríkisráðherra þora að lýsa yfir fyrirvaralausum stuðningi við aðild að sambandinu. Loks sagði hann framtíð umsóknarinnar felast í því að staðan yrði metin og þjóðinni síðan leyft að taka ákvörðun um framhaldið.

„Það eru mikil tækifæri sem felast í Evrópusambandinu,“ sagði Árni Páll Árnason í erindi sínu. Hann sagðist vera einn þeirra sem Bjarni lýsti eftir. Þá sagðist hann vissulega hafa efast um eigin afstöðu til aðildar, einkum í fyrra, eftir þær breytingar sem orðið hafa á sambandinu.

Hann lagði áherslu á mikilvægi þess að skipta um gjaldmiðil og sagði að það að búa við gjaldgengan gjaldmiðil sem er raunverulega einhvers virði og hægt er að nota í öðrum ríkjum væri mannréttindi. Þá benti hann á rétt fólks til að hafa laun í sama gjaldmiðli og það skuldar. Jafnframt benti hann á að fyrirtæki hér á landi ættu mörg hver erfitt uppdráttar. Í miðri ræðu Árna Páls gekk einn mótmælandi að púltinu með mótmælendaskilti við dræmar undirtektir fundargesta og var þess óskað að hann annaðhvort legði niður skiltið eða yfirgæfi fundinn.

Eðlilegt að hægja á viðræðunum

Árni Þór Sigurðsson sagði að eðlilegt hafi verið við þær aðstæður sem voru uppi um áramótin að endurskoða aðildarferlið. Sagði hann að væntingar margra hefðu verið að hægt yrði að ljúka viðræðunum fyrir lok kjörtímabilsins. -agði hann vonbrigði að ekki hefði tekist að klára þýðingarmikla málaflokka eins og til dæmis sjávarútvegskaflann.

Sagðist hann telja að það hafi verið rétt og skynsamlegt skref að hægja á viðræðunum. Hann lagði einnig áherslu á að ekki ætti að gera lítið úr skoðunum þeirra sem ekki vissu hvað fælist í aðild að ESB og vildu fá að vita slíkt. „Það á jafnvel enn meira við í dag að EES-samningurinn er að komast í visst öngstræti,“ sagði Árni Þór.

Guðmundur Steingrímsson sagði að Björt framtíð vildi klára aðildarviðræðurnar og gera það vel því að versta niðurstaðan væri vondur samningur. Hann sagði eitt mikilvægt gagn vanta inn í þessa umræðu núna, aðildarsamninginn sjálfan. Benti hann á að í kjölfar hrunsins hefðu Íslendingar komið að „nei-um“ og lokuðum dyrum í alþjóðasamfélaginu. Þá benti Guðmundur á að hann teldi fullveldi þjóðarinnar betur borgið innan ESB heldur en með EES-samningnum.