Loðnukvótinn aukinn um 120.000 tonn

Atvinnuvegaráðherra hefur á grundvelli tillagna Hafrannsóknarstofnunar ákveðið að heimila veiðar á 120 þúsund tonnum af loðnu í viðbót við áður útgefnar aflaheimildir.

Þetta kemur fram í tilkynningu frá ráðuneytinu.

Þar segir, að frá 21. janúar til 7. febrúar hafi rannsóknaskipið Árni Friðriksson verið við rannsóknir og mælingar á stærð loðnustofnsins frá miðjum Austfjörðum, norður um og allt að Norðvesturmiðum.  

„Útreikningar á stærð veiðistofnsins sem byggja á þessum mælingum sýna að alls mældust 873 þúsund tonn af kynþroska loðnu. Að viðbættum afla ársins fram að mælingum og náttúrulegum afföllum er áætlað að stærð veiðistofnsins þann 1. janúar hafi verið um 990 þúsund tonn,“ segir í tilkynningu.

„Áður en mælingar hófust þann 22. janúar var búið að veiða um 100 þúsund tonn á vertíðinni 2012/2013. Í ljósi gildandi aflareglu um að skilja 400 þúsund tonn eftir til hrygningar og á grundvelli ofangreindra mælinga í janúar - febrúar 2013, leggur Hafrannsóknastofnun til að leyfilegur hámarksafli á vertíðinni 2012/2013 verði ákveðinn 570 þúsund tonn, að meðtöldum þeim afla sem búið var að veiða þegar mælingar fóru fram. Er það 120 þúsund tonna viðbót við þá ráðgjöf sem gefin var þann 6. febrúar síðastliðinn,“ segir ennfremur.

• 2 blogg um fréttina

Bloggað um fréttina

• Ólafur Örn Jónsson: Þetta er eina vitið ef menn eru að stýra veiðum …
• Gísli Foster Hjartarson: .........snilldin ein