Innlent | mbl | 23.2.2013 | 14:57 | Uppfært 24.2.2013 20:38

Hanna Birna: Fólk öðlist trú á framtíðina

Hanna Birna Kristjánsdóttir á landdsfundi Sjálfstæðisflokksins í Laugardalshöll. mbl.is/Árni Sæberg

„Kæru landsfundarfulltrúar. Það er ríkisstjórn í landinu. Það er kannski ekki alltaf augljóst en hún er samt þarna enn,“ sagði Hanna Birna Kristjánsdóttir, frambjóðandi til varaformanns Sjálfstæðisflokksins, á landsfundi flokksins fyrir stundu.

Hanna Birna dró saman viðhorf ríkisstjórnarinnar til atvinnulífsins svona:

„Ef það hreyfist - er það skattlagt. Ef það heldur áfram að hreyfast - eru sett lög á það. Og ef það stoppar - er það sett á opinbera styrki.“

Hanna Birna býður sig fram til varaformanns Sjálfstæðisflokksins en hún ítrekaði í ræðu sinni í dag að hún stefndi ekki á formannssætið í flokknum.

Sagði hún að stundum hefði verið haft í flimtingum að forystumenn ríkisstjórnarinnar skildu ekki ensku. Enn alvarlegra væri að þeir skildu ekki íslensku og vísaði þar til sambandsleysis stjórnvalda við þjóðina.

„Þessar kosningar snúast um það eitt að fólkið í þessu landi öðlist trú á framtíðina,“ sagði Hanna Birna. Skattahækkanir hefðu gengið það nærri fólkinu í landinu að það sæi vart vonarglætu. Skuldastaða heimilanna væri ekki viðunandi, margar fjölskyldur gætu ekki meira.

Alvöru lýðræðisflokkur

„Sjálfstæðisflokkurinn er alvöru lýðræðisflokkur. 20.000 einstaklingar um land allt tóku þátt í að stilla upp framboðslistum fyrir næstu alþingiskosningar,“ sagði Hanna Birna og benti á að það væru rúmlega helmingi fleiri en allir þeir sem tóku þátt í að stilla upp listum fyrir alla aðra stjórnmálaflokka landsins.

Þá minnti hún á að Steingrímur J. Sigfússon hefði fengið innan við 200 atkvæði í prófkjöri VG í 40.000 manna kjördæmi, þ.e. Norðausturkjördæmi, og hvernig Guðmundur Steingrímsson lét handvelja sig sem formann flokksins af kunningjum og vinum. Sagðist Hanna Birna ekki vita hvort stuðninsmenn Guðmundar hefðu mætt í Star Wars-búningum á fundinn hjá Bjartri framtíð, „en í borgarstjórn hljóma þeir að minnsta kosti oft eins og þeir séu af allt annarri plánetu,“ sagði Hanna Birna.

„Við erum öll í framboði. Við sem eigum sameiginlega drauma fyrir framtíð Íslands erum öll frambjóðendur flokksins. Við erum boðberar hugsjóna og fulltrúar frelsisins,“ sagði Hanna Birna. „Árið 2013 verður ár nýs upphafs fyrir Ísland.“

„Við sjálf getum haft áhrif til góðs“

Ræða Hönnu Birnu var á persónulegum nótum. Hún rifjaði upp þegar hún sat ásamt verðandi eiginmanni sínum í gömlum Fiat og hlustaði á hann segja uppnuminn frá deginum sínum, eftir landsfund Sjálfstæðisflokksins 1991.

„Ég hugsaði með mér. Hvað er það eiginlega við þennan landsfund? Skyldi ég einhvern tíma verða svo uppnumin í pólitík að ég geti með svona mikilli gleði og stolti varið fjórum heilum dögum á fundi til að ræða framtíð lands og þjóðar. Ég skal viðurkenna að á þessum rúnti á litla Fiatnum okkar - þar sem við vorum bæði 22 árum yngri – ég með herðapúða og Villi með strípur - þá var ég ekki sannfærð um að svo yrði.“

Á landsfundi 1996 hefði hún hins vegar sannfærst algjörlega um töfra þessarar samkomu og upplifað stolt, gleði og þakklæti yfir að tilheyra hópi fólks sem léti sig málin varða. „Ég er í stjórnmálum því mig langar að einmitt þessi tilfinning – þessi vissa um að við sjálf getum haft áhrif til góðs nái til sem flestra.“

„Spurðu hvað þú getur gert“

Hún sagði einnig frá heimsókn sinni til Harvard-háskóla fyrir skömmu þar sem hún hefði tekið hús á Harvard Kennedy School of government. Þar hefði hún veitt athygli spjöldum þar sem stóð „spurðu hvað þú getur gert“ með vísan til frægrar ræðu Johns F. Kennedy þar sem forsetinn hvatti þegna sína til að spyrja ekki hvað Bandaríkin gætu gert fyrir þá heldur hvað þeir gætu gert fyrir Bandaríkin.

„Undir þessari lýsingu varð mér hugsað heim. Heim til Íslands sem þarf svo mikið á því að halda að við öll, hvert fyrir sig og hvert fyrir annað, spyrjum okkur að því hvað við getum gert. Hvað við getum gert fyrir landið okkar, fólkið og framtíðina,“ sagði Hanna Birna.

Hún sagði verkefnin framundan stærri en svo að þau yrðu leyst af atvinnustjórnmálamönnum, einum leiðtoga eða ríkisstjórn. Íslendingar þyrftu að vera reiðubúnir að spyrja fyrst hvað þeir gætu gert áður en lausnanna væri leitað hjá stjórnmálamönnum. „Hér í salnum eru fjölmargir einstaklingar sem hafa spurt sig hvað þeir geta sjálfir gert. Einstaklingar sem biðu ekki eftir því að aðrir gengju til verka fyrir þá heldur gerðu það sjálfir,“ sagði Hanna Birna.

Hún rifjaði upp að hún hefði sjálf verið í framboði gegn Bjarna Benediktssyni á síðasta landsfundi og fengið fínan stuðning. „Ég margítrekaði á síðasta landsfundi að ég myndi ekki bjóða mig aftur fram til formanns á þessu kjörtímabili, heldur virða ykkar val, kæru félagar, á síðasta landsfundi. Við það stendur. Ég tók engu að síður ákvörðun um að gefa kost á mér til varaformanns. Það er svar mitt við spurningunni „hvað get ég gert?”.“