Innlent | mbl | 1.3.2013 | 14:21 | Uppfært 14:41

Bjóða þingmönnum einn ískaldan

Mynd 1 af 3 Ráðherrar í ríkisstjórn Steingríms Hermannssonar árið 1989. Þar má m.a. sjá þau Jóhönnu Sigurðardóttur, núverandi forsætisráðherra, og Steingrím J. Sigfússon, sem er núverandi atvinnuvega- og nýsköpunarráðherra, mbl.is

Mynd 2 af 3 Bjórdagurinn var haldin hátíðlegur á Gauki á Stöng árið 1989. mbl.is/RAX

Mynd 3 af 3 Ólafur Ragnar Grímsson, þáverandi fjármálaráðherra, sést hér á Alþingi árið 1989 með Þórði Skúlasyni, varaþingmanni Alþýðubandalagsins. mbl.is

Stúdentakjallarinn ætlar að bjóða öllum þingmönnum sem áttu sæti á Alþingi 1. mars árið 1989 einn ískaldan bjór. Þetta er gert í tilefni þess að í dag eru liðin 24 ár frá því bjórinn var leyfður í sölu hér á landi.

Á Facebook-síðu Stúdentakjallarans kemur fram, að stúdentar, þáverandi og núverandi, séu allir sérstaklega stoltir af þætti sínum í aðdraganda bjórdagsins 1989.

„Um málið var m.a. deilt á gamla Stúdentakjallaranum við Hringbraut á sínum tíma en þar höfðu m.a. nokkrir stúdentar tekið upp á því að blanda „bjórlíki“. Ekkert í þá líkingu er þó í boði í nýja Stúdentakjallaranum við Háskólatorg - en af nógu öðru er þó þar að taka,“ segir á síðunni.

Ekki fylgir sögunni hvort þingmennirnir hafi þegið boðið.