Nýtt umferðarátak hófst formlega á föstudaginn en þá var haldinn fyrsti fundurinn í hópi sem hefur það verkefni að móta „umferðarsáttmála“. Verkefnið er samvinnuverkefni lögreglunnar á höfuðborgarsvæðinu og Umferðarstofu en einnig koma að því ýmsir hagsmunaaðilar í umferðinni.
Þá verða átta fulltrúar hins almenna vegfaranda í hópnum sem mun leiða vinnuna við að móta sáttmálann. Almenningur mun einnig geta komið sjónarmiðum sínum á framfæri við mótun sáttmálans.
Stefán Eiríksson, lögreglustjóri höfuðborgarsvæðisins, segir að markmiðið með sáttmálanum sé það að fækka slysum í umferðinni og auka þar með öryggi fólks. „Þetta verkefni gengur í rauninni út á það að komast að sameiginlegri niðurstöðu um það sem einkennir góða umferðarmenningu,“ segir Stefán og bætir við að vegfarendur eigi að geta sammælst um það hvað teljist viðurkennd hegðun í umferðinni og jafnframt gert kröfu um að henni sé fylgt.
Í fréttaskýringu um þetta mál í Morgunblaðinu í dag segir Stefán að verkefnið framundan sé að móta slíkan sáttmála með aðstoð almennings.