Snælduvitlaust veður fyrir norðan

Á Norðurlandi vestra er ófært á Þverárfjalli, Vatnsskarði og Siglufjarðarvegi. Þæfingur er annars víða eða hálka ásamt stórhríð eða skafrenningi. Samkvæmt upplýsingum frá lögreglu víða á Norðurlandi er snælduvitlaust veður og ekkert ferðaveður. Vegurinn um Námaskarð er enn lokaður vegna umferðaróhapps.

Hálkublettir eru á Mosfellsheiði og Lyngdalsheiði en annars eru vegir að mestu auðir á Suðurlandi.

Á Vesturlandi  er hálka eða hálkublettir nokkuð víða og sumstaðar él eða skafrenningur.  Hálka og skafrenningur er á Bröttubrekku og Holtavörðuheiði. Ófært er um Fróðárheiði.

Slæmt ferðaveður og færð er víðast hvar á Vestfjörðum. Ófært er á Steingrímsfjarðarheiði, Þröskuldum og Klettshálsi.

Hálka og skafrenningur er svo á Mikladal og Hálfdán. Hálka er einnig á Kleifaheiði og stórhríð en þungfært er í Ísafjarðardjúpi.

Norðaustanlands er ófært um Ólafsfjarðarmúla, Víkurskarð og á Grenivíkurvegi.

Óveður er svo á Hófaskarði en þar er einnig ófært.

Þæfingsfærð og stórhríð er milli Dalvíkur og Akureyrar og á Ljósavatnsskarði en snjóþekja og skafrenningur á Öxnadalsheiði. Hálka eða snjóþekja er á flestum öðrum leiðum og víða er stórhríð.

Á Austurlandi eru flestir vegir greiðfærir en þó er komin snjóþekja á Möðrudalsöræfi og Vopnafjarðarheiði ásamt éljagangi eða skafrenning.

Þá er einnig skafrenningur á Fjarðarheiði og snjóþekja.

• 2 blogg um fréttina

Bloggað um fréttina

• Axel Jóhann Hallgrímsson: Vorið kemur á venjulegum tíma, því miður
• Haraldur Haraldsson: Snælduvitlaust veður fyrir norðan/byrjaði á vestfjöruðum og færist í austur …