Innlent | mbl | 10.3.2013 | 6:59 | Uppfært 20:23

Veitt eftirför og sleginn í andlit

Eggert Jóhannesson

Lögreglu höfuðborgarsvæðisins var tilkynnt um líkamsárás í Grafarvogi á ellefta tímanum í gærkvöldi. Þá hafði bifreið verið veitt eftirför og þegar ökumaðurinn stöðvaði bifreiðina steig sá sem elti út úr bíl sínum og sló hann hnefahöggi í andlitið, með þeim afleiðingum að tennur brotnuðu.

Þetta kemur fram í tilkynningu frá lögreglu en nánari tildrög árásarinnar liggja ekki fyrir að svo stöddu. Árásarmaðurinn fór af vettvangi og er málið í rannsókn. Eins og hefðbundið er um helgar var töluverður erill hjá lögreglu vegna hávaða og ölvunar. Þannig var karlmaður handtekinn á veitingastað í Kópavogi seint í gærkvöldi. Sá var ölvaður og til vandræða. Hann vildi ekki gefa lögreglu persónuupplýsingar og var vistaður í fangageymslu.

Rétt eftir klukkan tvö var bifreið stöðvuð á Eiríksgötu. Ökumaðurinn handtekinn grunaður um ölvun við akstur.

Klukkan 2.20 var tilkynnt um umferðaróhapp í Breiðholti. Tjónvaldur var handtekinn grunaður um ölvun við akstur. Hann var vistaður í fangageymslu. Engin meiðsli urðu á fólki slysinu. Á fjórða tímanum var karlmaður handtekinn eftir slagsmál við veitingahús í Hafnarfirði. Hann verður vistaður í fangageymslu meðan ástand hans lagast. Rétt fyrir fjögur var bifreið stöðvuð við Skothúsveg. Ökumaðurinn handtekinn grunaður um ölvun við akstur. Á svipuðum tíma var bifreið stöðvuð í Skipholti. Ökumaðurinn handtekinn grunaður um akstur bifreiðar undir áhrifum fíkniefna. Sá hafði aldrei öðlast ökuréttindi og bifreiðin var ótryggð. Að endingu á fimmta tímanum í morgun var bifreið stöðvuð við Grandagarð. Ökumaðurinn handtekinn grunaður um ölvun við akstur. Ökumaðurinn var vistaður í fangageymslu að lokinni sýnatöku.