Hróp og köll þegar ljósin birtast

Reynslan af norðurljósaspám Veðurstofunnar er góð og bæði íslensk ferðaþjónustufyrirtæki og erlendir ferðamenn notfæra sér þær til að skipuleggja skoðunarferðir.

„Þetta hefur fallið í góðan jarðveg og það hefur komið okkur á óvart hvað það er mikið sótt í þessar spár. Við höfum fengið mjög góð viðbrögð frá ferðaþjónustufólki. Það og umbjóðendur þess nota þetta greinilega,“ segir Ingvar Kristinsson, þróunarstjóri Veðurstofunnar, um norðurljósaspárnar sem stofnunin hóf að birta í október í fyrra.

Í umfjöllun um þetta mál í Morgunblaðinu í dag segir Ingvar meðal annars, að spárnar séu á meðal mest sóttu undirsíðna veður.is og að meira sé sótt í ensku útgáfuna en þá íslensku. „Aðsóknin að enska hlutanum hefur aukist jafnt og þétt þannig að erlendir ferðamenn virðast nota spárnar mikið til að skipuleggja ferðir sínar.“

Norðurljósaspá Veðurstofunnar